Կարող ենք երեք միավոր վաստակել «Շախտյորի» հետ խաղում. Ֆերնանդո Տորես

Ֆերնանդո Տորեսը՝ որպես Եվրո 2012թ-ի լավագույն ռմբարկու, Չեմպիոնների լիգայի շրջանակներում կայանալիք «Չելսի»-«Շախտյոր» խաղին ընդառաջ պարգևատրվեց «Ոսկե խաղակոշիկ» մրցանակով, տեղեկացնում է «Չելսիի» պաշտոնական կայքը:

Իսպանացի ֆուտբոլիստը, Եվրոպայի 2012թ. առաջնության ընթացքում խաղադաշտում անցկացնելով 189 րոպե, հեղինակել է 3 գոլ:

Անդրադառնալով  «Չելսի»-«Շախտյոր» խաղին՝ Տորեսը նշել է, որ իր թիմի հարձակողական եռյակը առանցքային նշանակություն է ունենալու խաղի ընթացքում և իրենք ունակ են երեք միավոր վաստակել դոնեցկցիների հետ խաղում:

«Հաճելի է ֆուտբոլ խաղալը: Երբ դու խաղում ես այն ճնշման ներքո, որ մրցաշարից դուրս չմնալու համար պետք է հաղթես, խաղն ավելի հետաքրքիր է դառնում: Համոզված եմ, որ Ազարը, Օսկարը և Մատան մրցակցի դարպասների մոտ խնդիրներ կստեղծեն: Ահա թե ինչու են նրանք լավագույնը, և դրանում դուք ինքներդ կհամոզվեք»,-Տորեսի խոսքերը մեջբերում է goal.com-ը: