Դատարապտյալին անհրաժեշտ է տեղափոխել քաղաքացիական հիվանդանոց

Հոկտեմբեր ամսին «Վարդաշեն» քրեակատարողական հիմնարկի դատապարտյալ Գրիգոր Գրիգորյանի կինը Պաշտպանին դիմում էր ներկայացրել, որտեղ խնդրում էր Պաշտպանի միջնորդությունը իր ամուսնուն քաղաքացիական հիվանդանոց տեղափոխելու հարցում, քանի որ քրեակատարողական հիմնարկում Գրիգորյանը համապատասխան բուժում չի ստանում:

Դատապարտյալի խնդրի կապակցությամբ Պաշտպանը դիմել էր Արդարադատության նախարարություն, որտեղից, ի պատասխան, հայտնել էին, որ դատապարտյալի բուժումը կկազմակերպվի «Վարդաշեն» քրեակատարողական հիմնարկի պայմաններում:

Այնուամենայնիվ, դատապարտյալի առողջական վիճակին տեղում ծանոթանալու նպատակով նոյեմբերի 5-ին Պաշտպանի արագ արձագանքման բաժնի աշխատակիցները հանդիպեցին «Վարդաշեն» քրեակատարողական հիմնարկում գտնվող Գրիգոր Գրիգորյանին:

Աշխատակիցների հետ զրույցի ընթացքում դատապարտյալը ներկայացրել էր բողոքները կապված իր հիվանդությունների հետ և հայտնել, որ թե «Վարդաշենում» և թե «Դատապարտյալների հիվանդանոց» ՔԿՀ-ներում բժիշկները չունեն համապատասխան մասնագիտացում իր հիվանդությունները բուժելու համար: Արագ արձագանքման բաժնի աշխատակիցները պարզել էին նաև, որ Գրիգորյանը բժշկական հետազոտություն է անցել «Դատապարտյալների հիվանդանոց» ՔԿՀ-ում, սակայն այնտեղ հիվանդության վերջնական ախտորոշում այդպես էլ չի որոշվել:

Դատապարտյալի առողջական ծանր վիճակը հաստատել է նաև քրեակատարողական հիմնարկի բժշկուհին և տեղեկացրել, որ նրան անհապաղ անհրաժեշտ է տեղափոխել քաղաքացիական հիվանդանոց:

Դատապարտյալ Գրիգոր Գրիգորյանի խնդրի կապակցությամբ Պաշտպանը պատրաստվում է կրկին դիմել Արդարադատության նախարարին: