Փոփոխություն Հյուպատոսական ծառայության մասին օրենքում. ԱԺ հանձնաժողովը հավանություն տվեց

 ՀՀ ազգային ժողովի պետաիրավական հարցերի մշտական հանձնաժողովը հավանություն տվեց «Նոտարիատի մասին» օրենքում փոփոխություններ և լրացումներ կատարելու մասին և «Հյուպատոսական ծառայության մասին» օրենքում փոփոխություններ կատարելու մասին օրենքների նախագծերի փաթեթին, որով ի թիվս այլ փոփոխությունների, առաջարկվում է վերացնել ճզմիչ կնիքի պարտադիր առկայության պահանջը և ավելացնել QR կոդի առկայության պահանջը:

 «Արմենպրես»-ի փոխանցմամբ՝ նախագիծն ԱԺ հանձնաժողովի նիստում ներկայացրեց Արտաքին գործերի փոխնախարար Վահան Կոստանյանը:

«Նախատեսվում է բարձրացնել փաստաթղթերի իսկության ստուգման արդյունավետությունը, կրճատել հավելյալ ծախսերը՝ մասնավորապես ՀՀ դիվանագիտական ծառայության մարմինների մասով, համապարփակ կարգավորել հետախուզվող անձի նկատմամբ նոտարական գործողություն կատարելու մերժման կարգը և հստակեցնել ՀՀ դիվանագիտական ծառայության մարմինների անունից նոտարական գործողություններ կատարող անձանց շրջանակը»,-ասաց Կոստանյանը:

«Նոտարիատի մասին» օրենքով որպես նոտարական ակտի բաղադրիչ է հանդիսանում ճզմիչ կնիքը: Ներկայումս գործում է «QR» կոդը և «e-verify» համակարգը, որը հնարավորություն է տալիս հավաստիանալու վավերացված փաստաթղթի իսկության մեջ: Ըստ նախագծի հիմնավորման՝ նման պայմաններում նոտարական ակտի բովանդակության բաղադրիչ հանդիսացող ճզմիչ կնիքի անհրաժեշտությունը վերանում է: Այսպիսով՝ նախագծով առաջարկվում է վերացնել իրավակիրառ պրակտիկայում առաջացած խնդիրները, անհամապատասխանությունները, ճզմիչ կնիքի պարտադիր առկայությունը, ավելացնել QR կոդի և  «e-verify» համակարգի վերաբերյալ դրույթներ:

««Հյուպատոսական ծառայության մասին» օրենքում փոփոխություններ կատարելու մասին նախագծով հնարավորություն կընձեռվի խուսափել իրավական ակտերի միջև առկա հակասություններից և հստակեցնել հյուպատոսական պաշտոնատար անձի, այդ թվում հյուպատոսների և փոխհյուպատոսների կողմից մատուցվող նոտարական ծառայությունները»,-ասաց փոխնախարարը:

Նախագծով առաջարկվում է դիվանագիտական ներկայացուցչությունների և հյուպատոսական հիմնարկների անունից նոտարական գործողություններ կատարելու իրավասությունը վերապահել հյուպատոսական պաշտոնատար անձանց, իսկ նրանց բացակայության դեպքում՝ նոր միայն դիվանագիտական ծառայության մարմինների ղեկավարներին: Նշյալ հասկացությունը ներառում է ինչպես հյուպատոսներին, այնպես էլ փոխհյուպատոսներին: