Ի՞նչ մեսիջ կար՝ ուղղված Սերժ Սարգսյանին

Հայաստանի և Ֆրանսիայի նախագահներ Սերժ Սարգսյանի և Ֆրանսուա Օլանդի գրեթե մեկ ժամ տևած հանդիպման ամենակարևոր հարցը ԼՂ հիմնախնդիրն էր: Ֆրանսիայի նախագահը նշել է, որ Մինսկի խմբի համանախագահ Ֆրանսիան ամեն ինչ կանի, որ բանակցություններն ավարտին մոտենան:

Ֆրանսիայի նախագահը շեշտել է, որ ղարաբաղյան հիմնախնդրի կարգավորումը միջնորդ Ֆրանսիան մադրիդյան սկզբունքների շրջանակներում է տեսնում:

Հիշեցնենք, Հայաստանի նախագահ Սերժ Սարգսյանը կիրակի օրն է եռօրյա պաշտոնական այցով մեկնել Ֆրանսիա:

Նախագահները խոսել են նաև միջազգային զարգացումներից, Սիրիայում ծավալվող իրադարձություններից և իրանական միջուկային հիմնահարցից, որի վերաբերյալ առավել զուսպ արտահայտվելով՝ Օլանդը նշել է, որ հույս ունի, որ ՀՀ նախագահը իրանական կողմին կփոխանցնի հանդիպման ընթացքում հնչած հաղորդագրությունները:

Անդրադառնալով Սիրիայում տիրող իրավիճակին՝ Օլանդը նշել է, որ կողմ է, որ նշյալ երկրում իշխանափոխություն տեղի ունենա:

Սերժ Սարգսյանն իր խոսքում հատուկ շնորհակալություն է հայտնել Ֆրանսիայի իշխանություններին և ժողովրդին՝ Հայոց ցեղասպանության հարցը ուշադրության կենտրոնում պահելու և այդ գործում սկզբունքային լինելու համար:

Ֆրանսիայի նախագահը, ով Հայոց ցեղասպանության ժխտման համար պատիժ սահմանելն իր նախընտրական թեզերից մեկն էր դարձրել, խոստացել էր, որ հնարավորություն կգտնի և օրինագիծը նոր տեսքով Ազգային ժողով կմտցնի: Սակայն արդյունքում ո՛չ Օլանդը, ո՛չ Սարգսյանն այս հարցում արձանագրված առաջընթացի շուրջ չեն խոսել: Փոխարենը երկուսն էլ բարձրաձայնել են տնտեսական կապերը զարգացնելու իրենց ցանկությունը: Նախագահ Օլանդը նշել է, որ «Զարգացման ֆրանսիական գործակալություն»-ը կարող է ընդլայնել ՀՀ-ի հետ իր համագործակցությունը, հատկապես՝ ագրոպարենային և, ինչու չէ, նաև տրանսպորտային ոլորտում: