Արաբական երկրները ճանաչել են Սիրիայի միացյալ ընդդիմության ստեղծումը

Պարսից ծոցի 6 պետություններ, որոնք մտնում են Արաբական պետությունների համագործակցության խորհրդի մեջ, ճանաչել են Սիրիայի ընդդիմադիր կոալիցիան՝ որպես սիրիացի ժողովրդին ներկայացնող լեգիտիմ ուժ. փոխանցում է BBC-ն:

Պարսից ծոցի արաբական պետությունների համագործակցության խորհրդի մեջ մտնում են Սաուդյան Արաբիան, Արաբական միացյալ էմիրությունները, Բահրեյնը, Օմանը, Քաթարը և Քուվեյթը:

Միաժամանակ Արաբական պետությունների լիգայի արտգործնախարարները Կահիրեում իրենց նիստի ժամանակ ողջունել են ընդդիմադիր կոալիցիայի ստեղծումը: Նրանք այդ կազմակերպությունն անվանել են ընդդիմության «լեգիտիմ ներկայացուցիչ», սակայն չեն ճանաչել այն որպես Սիրիայի ողջ ժողովրդի ներկայացուցիչ:

Կիրակի օրը Քաթարի մայրաքաղաք Դոհայում հայտարարվել էր «Սիրիայի ընդդիմադիր և ապստամբական ուժերի ազգային կոալիցիայի» ստեղծման մասին, որի նպատակն է հանդիսանում միավորել Ասադի դեմ գործող բոլոր խմբակցություններին:

Կոալիցիան գլխավորում է Դամասկոսում Օմայանների մզկիթի նախկին սուննիական իմամ Մուազ Խաթիբը, ով այս տարվա հուլիսին մի քանի անգամվա բանտարկություններից հետո փախել էր Սիրիայից:

Արևմտյան պետությունները, ինչպես նաև՝ Թուրքիան, ողջունել են ընդդիամդիր կոալիցիայի ստեղծումը: