Իսրայելական ավիացիան կրկին ռմբակոծել է Գազայի հատվածը

Այսօր գիշեր իսրայելական ռազմաօդային ուժերը մի քանի հարվածով ոչնչացրել են իսլամիստների՝ Գազայի հատվածում տեղակայված զինապահեստը, ինչպես նաև հրթիռների արձակման համար նախատեսված երկու կետ. պաղեստինցիներից և ոչ ոք չի տուժել. գրում է ИТАР-ТАСС-ը։

Հիշեցնեnք, որ շաբաթ օրը Գազայի հատվածի այս շրջանում վիրավորվել էր իսրայելական բանակի 4 զինծառայող։ Ի պատասխան` պաղեստինյան անկլավը գնդակոծման էր ենթարկվել, ինչի հետևանքով սպանվել է 6 արաբ, տասնակ մարդիկ վիրավոր են։ Պաղեստինյան իսլամիստները վերջին օրերի ընթացքում Իսրայելի ուղղությամբ արձակել են մոտ 120 հրթիռ և ականանետ արկ, դրանցից մի քանիսը պայթել է սահմանամերձ բնակավայրերի տարածքում, սակայն խաղաղ բնակիչներ չեն տուժել։

Գազայի հատվածում իշխող ՀԱՄԱՍ շարժումը պնդում է, որ Իսրայելի վրա հարձակումների հետևում կանգնած են ոչ մեծ արմատական խմբավորումներ, որոնք չեն ենթարկվում կենտրոնական իշխանությանը։ ՀԱՄԱՍ-ի ղեկավարությունն իր հերթին հայտարարել է, որ պատրաստ է կոչ անել պաղեստինյան բոլոր ուժերին Գազայի հատվածում ենթարկվել հանուն զինադադարի պահպանման։

Երկուշաբթի օրը երեկոյան Իսրայելի վարչապետ Բենյամին Նեթանյահուն բանակցություններ է վարել երկրի պաշտպանության նախարարի և գլխավոր շտաբի պետի հետ։ Հանդիպման մանրամասների մասին ոչինչ չի հաղորդվում, սակայն, ըստ իսրայելական ԶԼՄ-ների, խոսքը Գազայի հատվածում Իսրայելի կողմից հնարավոր նոր լայնամասշտաբ ռազմական օպերացիայի մասին էր։