ՀԱԿ ակտիվիստների դատավարության կազմակերպիչը` նախկին բարձրաստիճան պաշտոնյա՞

Լուրեր.com-ի հետ զրույցում ԱԺ ԲՀԿ պատգամավոր Նաիրա Զոհրաբյանն ասաց, որ երեկ շատ կցանկանար մասնակցել ՀԱԿ ակտիվիստների գործով դատավարությանը, բայց Աժ-ում բյուջետային քննարկումներ էին սկսվել։

«Ես դատական նիստին չեմ հետևել, բայց մանրամասն տեղյակ եմ մասնավորապես Տիգրան Առաքելյանի գործին. այդ մասով միանշանակ առաջին ատյանի դատարանի վճիռը պետք է բեկանվի։ Այն ապացուցողական բազան, որ որպես հիմք ընդունում է նման դատավճիռ կայացնելու համար, անգամ որևէ քննադատության չի դիմանում»,-ասաց Զոհրաբյանը։

Երեկ դատարանը մերժեց ակտիվիստների գործով փաստաբանների բոլոր միջնորդությունները, զրկեց նրանց վերջին հայտարարության հնարավորությունից, և ամենայն հավանականությամբ, այսօր կհրապարակվի դատարանի վճիռը։ Լրագրողի այն հարցադրմանը, թե առաջին ատյանի վճիռը չբեկանելու դեպքում ինչ քայլեր կձեռնարկի ԲՀԿ-ն, Զոհրաբյանն ասաց.   

«Կուսակցությունը նման հարց չի քննարկել, բայց ես վստահ եմ, որ եթե արդարությունն այստեղ հնարավոր չլինի վերականգնել, հարցը կհասնի Եվրոպական դատարան։ Ես կրկին անգամ չէի ցանկանա, որ Ստրասբուրգում մենք ստիպված լինեինք այս խնդրին անդրադառնալ, բայց եթե հարցը հասնի դրան, բնականաբար, այո, Եվրոպայի խորհրդի խորհրդարանական վեհաժողովում ևս այս հարցին կանդրադառնանք»,-ասաց Զոհրաբյանը։

Նա նշեց, որ այդ դատավճիռն ակնհայտ սխալ է։

«Տիգրան Առաքելյանն ինձ հետ զրույցում նշել է, որ այս ամենը ոստիկանության նախկին բարձրաստիճան պաշտոնյայի անձնական դրդապատճառների հետևանք է»,-ասաց ԲՀԿ պատգամավորը։  

Լրագրողի այն հարցին, թե արդյոք խոսքը նախկին ոստիկանապետ Ալիկ Սարգսյանի մասին է, ԲՀԿ պատգամավորն ասաց. «Ես չեմ ցանկանա մանրամասնել, թե ում մասին ենք խոսել ես և Տիգրան Առաքելյանը, բայց խոսքը վերաբերում է նախկին բարձրաստիճան մի պաշտոնյայի, ով ըստ Տիգրանի՝ այս ամենի կազմակերպիչն է»։

Հիշեցնենք, որ երեկ Վերաքննիչ դատարանում ՀԱԿ ակտիվիստների գործով հերթական դատավարության ընթացքում դատավորը երիտասարդներին հեռացրել էր նիստերի դահլիճից, մերժել փաստաբանների ներկայացրած բոլոր միջնորդությունները և հեռացել որոշում կայացնելու, որը կհայտարարվի այսօր՝ 12.00-ին։ 

 Գայանե Համբարձումյան