Վրաստանի ՆԳ և ՊՆ նախկին նախարարը մեղադրվում է զինծառայողներին կտտանքների ենթարկելու մեջ

Վրաստանի Պաշտպանության և Ներքին գործերի նախկին նախարար Բաչո Ախալայայի նկատմամբ ևս երկու հոդվածով մեղադրանք է ներկայացվել՝ անօրինական ազատազրկումների իրականացում և կտտանքներ ենթակաների նկատմամբ: Այս մասին ճեպազրույցի ժամանակ հայտարարել է գլխավոր դատախազ Արչիլ Քբիլաշվիլին. հայտնում է Newsgeorgia-ն:

Քբիլիաշվիլիի խոսքերով՝ մեղադրանքները վերաբերում են 2010թ. փետրվարի դեպքերին: Այն ժամանակ գվարդիայի մատակարարման դեպարտամենտի 19 զինծառայող հրաժարվել էր առավոտյան մարզանք կատարել՝ պատճառաբանելով գիշերային հերթապահությունը: Փետրվարի 18-ին այս զինծառայողները Թբիլիսիից տեղափոխվել էին Սենակիում գտնվող բազա, ուր նրանց, հետաքննության տվյալներով, դիմավորել էին այն ժամանակվա Պաշտպանության նախարար Բաչո Ախալայան, Միացյալ շտաբի փոխնախարար Գեորգի Քալանդաձեն և գերատեսչության ևս մի քանի պաշտոնյաներ:

Դատախազը պնդում է, որ Սենակիում գտնվող բազայում զինծառայողներին հասցվել են մարմնական և խոսքային վիրավորանքներ, որից հետո նրանց ստիպել են հանվել և մերկ վազել: Ապա Ախալայայի հրամանով զինծառայողներին փակել են բաղնիքում, ուր նրանց ստիպել են 3 օր սոված մնալ:

«Այս միջադեպի կապակցությամբ Բաչո Ախալայայի նկատմամբ մեղադրանք է հարուցվել նաև 142-րդ հոդվածով (անօրինական ազատազրկում) և 144-րդ հոդվածով (կտտանքներ)»,-ասել է Քբիլաշվիլին: