ՆԱՏՕ. Դաշինքի անդամ երկրները կարող են անհատական կարգով զենք վաճառել Ադրբեջանին և Հայաստանին

Քանի որ Ադրբեջանն ու Հայաստանը գտնվում են պատերազմական իրավիճակում, ՆԱՏՕ-ն այդ երկրներին զենքի ու տեխնիկայի վաճառքի էմբարգո է սահմանել։ Դաշինքի պաշտոնական ներկայացուցիչները համարում են, որ Հարավային Կովկասում ՆԱՏՕ-ի ռազմական ներկայությունը կարող է տարածաշրջանում խախտել կայունությունը։ Ուստի, հաշվի առնելով վերը նշվածը, այնուամենայնիվ, ՆԱՏՕ-ի պաշտոնական անձանց խոսքերով՝ դաշինքի անդամները կարող են անհատական կարգով այդ երկրներին զենք վաճառելու որոշում ընդունել «և դա կախված կլինի նշյալ երկրների նախաձեռնությունից»։

Այդ մասին հայտարարվել է ՆԱՏՕ-ի շտաբ-կայանում գտնվող մի շարք միջազգային լրատվամիջոցների լրագրողներին։

Ըստ ադրբեջանական լրատվամիջոցների հաղորդագրությունների՝ ՆԱՏՕ-ի ներկայացուցիչների նշյալ որոշումն իր հիմքերն ունի, քանի որ Ադրբեջանի զինված ուժերի արդիականացումը, ՆԱՏՕ-ի PARP և IPAP ծրագրերով ընձեռնված պարտավորությունների կատարումը, ինչպես նաև Աֆղանստանում պաշտոնական Բաքվի ավանդը «բարձր է գնահատվել ՆԱՏՕ-ում»։

Նշվել է, ՆԱՏՕ-ի և Ադրբեջանի միջև մի շարք ծրագրերի իրագործման մասին, ՆԱՏՕ-ի՝ Ադրբեջանի պաշտպանության և անվտանգության հատվածում շարունակվող մի շարք վարժանքների, փորձագիտական աջակցության և այլնի մասին։

Հարկ է նշել, որ ՆԱՏՕ-ն նաև «Հանուն խաղաղության գործընկերության վստահության հիմնադրամ»-ի միջոցով մասնակցում է Ադրբեջանում և Վրաստանում ապառազմականացման վերաբերյալ մի շարք նախագծերին: