Այս խաղում հաղթելու մեծ ցանկություն կա. Վարդան Մինասյան

Հայաստան-Լիտվա խաղին ընդառաջ Հայաստանի հավաքականի գլխավոր մարզիչ Վարդան Մինասյանը լրագրողների հետ հանդիպմանը նշել է, որ հավաքը կարճ է տևել. Հրայր Մկոյանը չի խաղա, Սարկիսովի մասնակցությունը կասկածի տակ է, չի խաղա նաև Յուրա Մովսիսյանը, իսկ Արզումանյանը երեկ որոշակի խնդիրներ ունեցավ իր ակումբի կազմում:

Անդրադառնալով Սարգիս Հովսեփյանին՝ Վարդան Մինասյանը նշել է.

«Նա լեգենդար մարդ է: Նա արժանի է դրան: Սարգիս Հովսեփյանը միշտ լինելու է մեր հավաքականի կողքին, բայց ունենալու է իր պարտականությունները: Նա պրոֆեսիոնալ էր բոլոր առումներով»։

Անդրադառնալով Չեխիայի հետ կայանալիք հանդիպմանը՝ հավաքականի մարզիչը նշել է. «Մենք ունենք պաշտպանների խնդիրներ: Մինչև այդ խաղը 3-4 խաղ կունենանք և կհասկանանք, թե ովքեր կխաղան նրանց փոխարեն: Հուսով եմ, որ  նոր անուններ կլինեն»:

- Ո՞վ կփոխարինի Հովսեփյանին հարցին Մինասյանը պատասխանեց. «Հովհաննես Համբարձումյան, Կամո Հովհաննիսյան, Արտակ Եդիգարյան, բայց ես ցանկանում եմ նաև նոր անուններ լսել։ Այս խաղում հաղթելու մեծ ցանկություն կա: Բայց բոլորս էլ գիտենք, որ ընկերական խաղերում վերապահումներ միշտ լինում են»:

Նշենք, որ Սարգիս Հովսեփյանը չմասնակցեց ասուլիսին, թեև կանխավ նշվել էր նաև նրա մասնակցության մասին:

Նշենք նաև, որ Հայաստան-Լիտվա հանդիպմանը նախկին ավագը կմասնակցի 5 րոպե: Իսկ մեծարման արարողությունը կլինի ընդմիջմանը։