Այս տարի ավելի քան 600 հազար զբոսաշրջիկ է այցելել Հայաստան

Նոյեմբերի 13-ին ՀՀ էկոնոմիկայի նախարարությունում տեղի ունեցավ ՀՀ էկոնոմիկայի նախարարի տեղակալ Արա Պետրոսյանի մամուլի ասուլիսը:

Վիճակագրական տվյալների համաձայն՝ 2012թ. հունվար-սեպտեմբերին Հայաստան է ժամանել թվով 603 074 զբոսաշրջիկ: 2011թ. նույն ժամանակաշրջանի նկատմամբ ցուցանիշը աճել է 9.4%-ով:

Հոկտեմբերի 18-19-ին Երևանում կայացավ «Համամարդկային արժեքները և մշակութային բազմազանությունը 21-րդ դարում. զբոսաշրջության ներդրումը» խորագրով միջազգային համաժողովը, որին մասնակցեցին ՄԱԿ Զբոսաշրջության համաշխարհային կազմակերպության (ՄԱԿ ԶՀԿ) գլխավոր քարտուղարը, ՄԱԿ ԶՀԿ անդամ երկրների զբոսաշրջության պատասխանատու պաշտոնյաներ, Հայաստանի բարձրաստիճան պաշտոնյաներ, միջազգային կազմակերպությունների և մասնավոր հատվածի ներկայացուցիչներ, ուսանողներ (ընդհանուր թվով շուրջ 150 մասնակից):

Համաժողովի արդյունքում ընդունվեց հռչակագիր՝ Երևանյան հռչակագիրը: Այն էապես կնպաստի զբոսաշրջության կայուն զարգացման միջոցով համամարդկային արժեքների և մշակութային բազմազանության արժևորմանը, ամրապնդմանն ու զարգացմանը, ինչպես նաև վերոնշյալ գործընթացներին Հայաստանի ակտիվ ներգրավմանը:

Համաժողովն անցավ բարձր մակարդակով և ունեցավ մեծ արձագանք: Այն հնարավորություն ընձեռեց Հայաստանին նորովի ներկայանալու համաշխարհային զբոսաշրջային հանրությանը:

Հոկտեմբերի 18-19-ին Երևանում տեղի ունեցավ նաև ԱՊՀ անդամ-պետությունների Զբոսաշրջության Խորհրդի հերթական նիստը, որին մասնակցեցին մի շարք ԱՊՀ անդամ-պետությունների զբոսաշրջության ոլորտի ներկայացուցիչներ:

Միջոցառումն արժանացավ մասնակիցների բարձր գնահատականին:

ՀՀ կառավարության 04.10.2012 N 1255-Ն որոշմամբ Եվրոպական միության անդամ պետությունների և Եվրոպական միության շենգենյան դրույթները կիրառող՝ Եվրոպական միության ոչ անդամ պետությունների քաղաքացիների համար 2013 թվականի հունվարի 10-ից սահմանվել է առանց մուտքի վիզայի այցելությունների ռեժիմ:Մշակվել է և շուտով ՀՀ կառավարության քննարկմանն է ներկայացվելու "Գյումրի քաղաքում զբոսաշրջության զարգացման ծրագիրը հաստատելու մասին" ՀՀ կառավարության որոշման նախագիծը: Մշակվել և համաձայնեցման փուլում են զբոսաշրջության բնագավառում համագործակցության վերաբերյալ համաձայանգրերի նախագծեր Չինաստանի Ժողովրդական Հանրապետության, Եգիպտոսի Արաբական Հանրապետության, Շրի Լանկայի Հանրապետության, Քաթարի Պետության, Հորդանանի Հաշիմյան Թագավորության և Իսպանիայի Թագավորության հետ: Մեկնարկել է Չինաստանի կողմից Չինական զբոսաշրջային շուկայի համար Հայաստանին "Երաշխավորված զբոսաշրջային երկիր" (ADS) կարգավիճակի շնորհման գործընթացը:

2012 թվականին Հայաստանը ներակայացվել է հետևյալ հեղինակավոր միջազգային զբոսաշրջային ցուցահանդեսներում.

2012թ. Հունվարին Նիդերլանդների Ուտրեխտ քաղաքում կայացած “Vakantiebeurs՛2012” զբոսաշրջային միջազգային ցուցահանդեսում՝ 5 զբոսաշրջային ընկերությունների մասնակցությամբ: 2012թ. մարտին Գերմանիայի մայրաքաղաք Բեռլինում կայացած “ITB’12” զբոսաշրջային միջազգային ցուցահանդեում՝ 17 զբոսաշրջային ընկերությունների մասնակցությամբ: 2012թ. մարտին ՌԴ Մոսկվա քաղաքում կայացած „MITT‘12 միջազգային ցուցահանդեսում՝ 8 զբոսաշրջային ընկերությունների մասնակցությամբ: 2012թ. սեպտեմբերին Փարիզում կայացած “Top Resa’2012” միջազգային ցուցահանդեսում, որին մասնակցել են Հայաստանի և Լեռնային Ղարաբաղի Հանրապետության ներկայացուցիչները: 2012 թ. սեպտեմբերին Ճապոնիայի Տոկիո քաղաքում կայացած “JATA-2012” միջազգային ցուցահանդեսում և միջազգային զբոսաշրջային այլ համաժողովներում: Հայկական պատվիրակությունը մասնակցել է Լոնդոնում անցկացվող “WTM’2012” զբոսաշրջության միջազգային ցուցահանդեսին: