Քիմ Քարդաշյանը կոչ է արել աջակցել սիրիահայերին

Քիմ Քարդաշյանը սեփական բլոգում կոչ է արել աջակցել սիրիահայերին՝ մասնակցելով դրամահավաքին: Իր բլոգում նա մասնավորապես գրել է.

«Պարզապես ցանկանում եմ կիսվել Ձեզ հետ մի մտահոգությամբ, որն այժմ շատ կարևոր է: Շատերը հնարավոր է այս մասին տեղյակ չեն: Սիրիայում ապրում են գրեթե 100 հազար հայեր, որոնցից շատերը մազապուրծ են եղել Հայոց ցեղասպանության տարիներին: Սակայն վերջին ժամանակներում սիրիական բանակի և զինյալների միջև պայքարի հետևանքով հազարավոր հայեր տուժել են: Ավերվել են մի շարք հայկական եկեղեցիներ, այրվել ու թալանվել են հազարավոր հայերի տներ: Շատերն են տարհանվել իրենց տներից, տասնյակ անմեղ քաղաքացիներ են սպանվել և տասնյակ հազարավորները պայքարում են պարզապես սնունդ կամ ապաստան գտնելու համար: Սիրիահայերի օգնության հիմնադրամը ստեղծվել է դրամահավաք կատարելու համար, որի օգնությամբ սիրիահայերին տրամադրվում է սննդամթերք, դեղորայք, ջուր, ապաստարան և անգամ դասընթացներ են կազմակերպվում այն երեխաների համար, որոնց դպրոցները փակվել են: Հայկական ժառանգությունն աներևակայելիորեն կարևոր է ինձ համար և կարծում եմ՝ պետք է բարձրացնել այդ ամենի մասին իրազեկությունը բոլորի համար»:

Այս մասին իր բլոգում գրել է Skandalist–ը։