Գեներալ Փեթրեուսի շուրջ սկանդալն ընդլայնվում է

ԱՄՆ-ի պաշտպանության նախարարությունը հետաքննություն է անցկացնում Աֆղանստանում ԱՄՆ-ի զորքերի հրամանատար, գեներալ Ջոն Ալենի նկատմամբ, որին մեղադրում են ԱՄՆ-ի Կենտրոնական հետախուզական վարչության տնօրեն Դեյվիդ Փեթրեուսի հրաժարականի պատճառը դարձած կնոջ հետ «ոչ պատշաճ կերպով հաղորդակցվելու մեջ»:

ԱՄՆ-ի զինված ուժերի բարձրաստիճան պաշտոնյաներից մեկն այսօր՝ ս.թ. նոյեմբերի 13-ին ասել է, որ Պենտագոնն ուսումնասիրում է 2010-ից 2012 թվականներն ընկած ժամանակահատվածում գեներալ Ալենի և Ջիլ Քելիի միջև 20-ից 30 հազար էջ ծավալով նամակագրությունը: Պաշտոնյան չի մանրամասնել փաստաթղթերի բնույթը, սակայն ասել է, թե գոյություն ունի «հստակ հնարավորություն», որ այս գործը կապ ունի Փեթրեուսի նկատմամբ իրականացվող հետաքննության հետ: Ջիլ Քելին գեներալ Փեթրեուսի ընկերն է, որի կողմից Հետախուզության դաշնային բյուրոյին՝ ՀԴԲ-ին ներկայացված բողոքն այն կնոջ մասին, որի հետ կապի մեջ էր Փեթրեուսը, դարձել է անցյալ շաբաթ գեներալի հրաժարականի պատճառը: ՀԴԲ-ն իր հերթին կիրակի օրը գեներալ Ալենին վերաբերող նյութեր է ներկայացրել ԱՄՆ-ի պաշտպանության նախարարությանը, ինչից հետո ԱՄՆ-ի պաշտպանության նախարար Լեոն Պանետան կարգադրել է Պենտագոնի ավագ քննիչին հետաքննություն հարուցել:

Գեներալ Ալենը հերքել է որևէ խախտում կատարելու մասին իրեն ներկայացվող մեղադրանքները և հետաքննության ընթացքում պահպանելու է Աֆղանստանում ունեցած իր պաշտոնը: 

Պաշտպանության նախարարության պաշտոնյան չի նշել, թե արդյոք հետաքննությունը քրեական բնույթի է, սակայն այս իրավիճակը բավականին մտահոգություն է առաջացրել Պենտագոնում, որպեսզի վերջինս հետաքննություն սկսի՝ այս մասին տեղեկացնելով ԱՄՆ-ի Կոնգրեսին: Պաշտոնյան որևէ տեղեկություն չի ներկայացրել նաև այն հանգամանքի շուրջ, թե արդյոք նախարար Պանետան ուսումնասիրել է գործին վերաբերող փաստաթղթերը և նշել Փեթրեուսի անունը:

ԱՄՆ-ի նախագահ Բարաք Օբաման անցյալ ամիս առաջադրել էր գեներալ Ալենի թեկնածությունը Եվրոպայում ԱՄՆ-ի զինված ուժերի հրամանատարության ղեկավարի և Եվրոպայում դաշնակիցների հաջորդ գերագույն հրամանատարի պաշտոնում: Պենտագոնի խոսնակը հայտնել է, որ նախագահը հետաձգել է գեներալ Ալենի առաջադրումը, իսկ նախարար Պանետան դիմել է ԱՄՆ-ի Սենատին՝ այս պաշտոնում գեներալի նշանակման մասին լսումները հետաձգելու խնդրանքով: ԱՄՆ-ի նախագահն ավելի վաղ գեներալ Ալենին Աֆղանստանում փոխարինելու նպատակով առաջադրել էր գեներալ Ջոզեֆ Դանֆորդի թեկնածությունը: Ըստ Պենտագոնի՝ նախարար Պանետան ցանկություն է հայտնել, որպեսզի գեներալ Դանֆորդի թեկնածությունը հաստատվի հնարավորինս արագ՝ անկախ նոր հետաքննության արդյունքներից: