ՆԱՏՕ-ի ակնարկը Սիրիային. վերջինս պաշտպանելու է թուրքերին

Ելույթ ունենալով Պրահայում գումարված ՆԱՏՕ-ի խորհդարանական վեհաժողովի 58-րդ նստաշրջանում՝ Հյուսիսատլանտյան դաշինքի գլխավոր քարտուղար Անդերս Ֆոգ Ռասմուսենն ասել է, որ ՆԱՏՕ-ն ամեն բան կանի իր անդամ Թուրքիան վտանգի պայմաններում պաշտպանելու համար։

Պաշտոնական Անկարային անհանգստացնում են Սիրիայի հետ սահմանի մոտակայքում ծավալվող մարտական գործողությունները։ Իր տարածքի հենց այդ հատվածում թուրքական բանակը տասնամյակներ շարունակ պայքար է մղում քուրդ անջատողականների դեմ։ Դաշինքն ունի գործողությունների անհրաժեշտ ծրագիր, որը հարկ եղած դեպքում կիրականացվի Թուրքիան պաշտպանելու համար», - Պրահայում ասել է Ռասմուսենը եւ ավելացրել.-«Հուսով եմ, որ իմ այս նախազգուշացումը զսպող ազդեցություն կգործի, եւ Թուրքիայի վրա հարձակումներ չեն լինի»։

Թուրքերը, իրենց հերթին հայտնել են, որ ՆԱՏՕ-ի հետ բանակցում են Patriot տեսակի «երկիր-երկինք» հրթիռներ Թուրքիայում տեղադրելու շուրջ։ Դրանք կարող են անհրաժեշտ լինել այն դեպքում, եթե Սիրիայի ներքին պատերազմը ընդարձակվի հարեւան երկրների տարածք։ Այդ մասին ասել է Թուրքիայի արտաքին գործոց նախարար Ահմեթ Դավութօղլուն։ Նախագահ Աբդուլլահ Գյուլն էլ ասել է, որ Անկարան կարող է ցանկացած զինատեսակ ձեռք բերել սիրիական սպառնալիքը չեզոքացնելու համար։

Ուշագրավ է մեկ փաստ, համաձայն որի՝ Թուրքիայի խորհրդարանը հոկտեմբերի 4-ի դռնփակ նիստում վարչապետ Ռ.Էրդողանի կառավարությանը մեկ տարով տրամադրել է երկրի անվտանգությունն ապահովելու համար պետական սահմաններից դուրս ռազմական գործողություններ կատարելու իրավունք։

Ըստ միջազգային վերլուծաբանների՝ Թուրքիա Patriot-ներ ուղարկելը այդ երկրի տարածքում ՆԱՏՕ-ի՝ հակահրթիռային համակարգեր տեղակայելու ընդարձակ ծրագրի ընդամենը մեկ փուլն է։ Թուրքիան 2010 թվականից է ընդգրկվել ամերիկյան հակահրթիռային համակարգերի տեղակայման գլոբալ ծրագրում։ Ընդ որում, այդ համակարգը, ինչպես երկու տարի առաջ է հաղորդվել, պետք է վնասազերծի Իրանից բխող հավանական վտանգը։ Հիմա էլ «թիրախը» Սիրիան է դարձել։

Ըստ ռազմական փորձագետների՝ ԱՄՆ-ն աստիճանաբար նվազեցնում է ներկայությունը Մերձավոր Արևելքում եւ առավել ուշադրություն է հատկացնում Ասիային։