ԱՄՆ-ը ընդլայնում է իր մուտքը դեպի Ավստրալիայի ռազմակայաններ

ԱՄՆ-ի արտգործնախարար Հիլարի Քլինթընը, պաշտոնական այցով գտնվելով Ավստրալիայի Պերտ քաղաքում, հանդիպումներ է անցկացրել երկրի վարչապետ Ջուլիա Գիլարդի հետ: Քննարկումների հիմնական թեմաներից է եղել դեպի Ավստրալիայի արևմուտքում գտնվող ռազմակայաններ Միացյալ Նահանգների զինծառայողներին մուտքի տրամադրումը:

Նախարարների մակարդակով անցկացվող նշյալ հանդիպումների ընթացքում ռազմական համագործակցության ամրապնդման հարցերի քննարկմանը գերակշռող ուշադրություն կհատկացվի: Կողմերը, մասնավորապես, քննարկելու են նաև դեպի Արևմտյան Ավստրալիա նահանգի մայրաքաղաք Պերտի մոտակայքում գտնվող «Ստերլինգ» ռազմածովային ուժերի կայան ամերիկյան ռազմանավերի մուտքի հնարավորությունը:
ԱՄՆ-ի արտգործնախարար Քլինթոնի Ավստրալիա կատարվող այցը, որի ընթացքում վերջինս բանակցություններ է վարելու նաև երկրի վարչապետ Գիլարդի հետ, համընկել է Միացյալ Նահանգների պաշտպանության նախարար Լեոն Պանետայի՝ այս երկիր կատարվող այցի հետ:
Ավստրալիայի և Միացյալ Նահանգների միջև նախարարների մակարդակով անցկացվող ամենամյա քննարկումներում մասնակցում են նաև երկու պետությունների բարձրաստիճան պաշտոնյաներ:

Ուշագրավ է, որ ըստ տեղեկատվության՝ Ավստրալիան նախատեսում է 5,5 միլիարդ դոլարով կրճատել իր ռազմական բյուջեն, սակայն, ըստ փորձագետների, նման կրճատումն ազդեցություն չի գործի ռազմական ոլորտում կատարվող իր ծախսերը նույնպես վերանայող ԱՄՆ-ի հետ բազմամյա համագործակցության վրա:

Հարկ է նշել, որ ԱՄՆ-ի և Ավստրալիայի միջև ռազմական հարաբերություններն ունեն 60 տարվա պատմություն և Ավստրալիայի բազմաթիվ կառավարություններ բազմիցս նշել են, որ ԱՄՆ-ի հետ ռազմական համագործակցությունն ընկած է Ավստրալիայի ազգային անվտանգության հիմքում: