«Ուսուցանում ուսուցանողների համար» համաժողովը միտված է ոչ ֆորմալ կրթության զարգացմանը

Հոկտեմբերի 14-16-ին «AIESEC Հայաստանը» Հայաստանի երիտասարդական հիմնադրամի աջակցությամբ իրականացնում է «Ուսուցանում ուսուցանողների համար» («Train of Trainers») համաժողովը, որին մասնակցում են շուրջ 50 պատվիրակներ, այդ թվում 35-ը՝ AIESEC-ի անդամներ, 15-ը՝ երեւանյան բուհերի ուսանողներ։

Ըստ «AIESEC Հայաստանի» նախագահ Սարգիս Ղոնյանի, AIESEC-ը միջազգային ամենամեծ հասարակական երիտասարդական կազմակերպությունն է, որ հնարավորություն է ընձեռում երիտասարդներին բացահայտել եւ զարգացնել իրենց ներուժը՝ դրանով իսկ նպաստելով հասարակության զարգացմանը: AIESEC-ը ներկայացված է աշխարհի շուրջ 110 երկրում եւ առաջնորդական հնարավորություններ է տալիս ուսանողներին ու երիտասարդ մասնագետներին միջազգային փոխանակման ծրագրերի ու կոնֆերանսների միջոցով: Հայաստանում այն գործում 1991թ.-ից եւ իրականացնում է տարեկան 4 ազգային ու միջազգային համաժողովներ ու ավելի քան 40 փոխանակման ծրագրեր:

«Ուսուցանում ուսուցանողների համար» համաժողովը ոչ միայն կազմակերպության անդամների, այլեւ ուսանողների համար է։ Անցկացվող սեմինարները մասնակիցներին կօգնեն բացահայտելու իրենց ուժեղ եւ թույլ կողմերը՝ դրանք հետագայում զարգացնելու համար, բացի այդ, կծանոթացնեն դասընթացներ վարելու հմտություններին»,- Հայաստանի երիտասարդական հիմնադրամի հասարակայնության հետ կապերի ծառայության փոխանցմամբ, նշել է Սարգիս Ղոնյանը՝ ավելացնելով, որ համաժողովը միտված է Հայաստանում ոչ ֆորմալ կրթության զարգացմանը։