Գիշերվա մեջ առկայծող կրակը. Այսօր Միքայել Նալբանդյանի ծննդյան օրն է (տեսանյութ)

-Ազատությո՜ւն,- գոչեցի, -
Թող որոտա իմ գլխին
Փայլակ, կայծակ, հուր, երկաթ,
Թո՛ղ դավ դնե թշնամին.

Ես մինչ ի մահ, կախաղան,
Մինչև անարգ մահու սյուն,
Պիտի գոռամ, պիտ կրկնեմ
Անդադար. ազատությո՜ւն։

Այսօր ազատության երգիչ Միքայել Նալբանդյանի ծննդյան օրն է։

Ծնվել 1829 թվականին։ Սովորել է հայրենի քաղաքում՝ Նոր Նախիջևանում, Գաբրիել Պատկանյանի դպրոցում։ Հոգևորական հալածանքներից և իշխանությունների հետապնդումից խուսափելով՝ 1853-ին մեկնում է Պետերբուրգ, որտեղ էլ հանձնում է համալսարանական քննություններ՝ հայոց լեզվի ուսուցչի իրավունք ստանալու համար։ Նալբանդյանը հայոց լեզու է դասավանդել Մոսկվայի Լազարյան ճեմարանում՝ միաժամանակ սովորելով Մոսկվայի համալսարանի բժշկական ֆակուլտետում՝ որպես ազատ ունկնդիր։ Հետագայում Նալբանդյանը երկու անգամ ուղևորություն է կատարում արտասահման։ Լոնդոնում եղած ժամանակ կապեր է հաստատում Գերցենի, Օգարյովի, Սեռնո Սոլովևիչի հետ։ 1862թ. վերադառնում է արտասահմանից Նոր Նախիջևան և այնուհետև հուլիսի 14-ին ձերբակալվում է ցարական ոստիկանության գործակալների կողմից և տարվում Պետերբուրգի Պետրոպավլովյան բանտը։

Նալբանդյանը վախճանվել է թոքախտից Սարատով նահանգի Կամիշին քաղաքի աքսորավայրում 1866 թվականի մարտի 31-ին։

Առաջարկում ենք Ձեզ դիտել «Գիշերվա մեջ առկայծող կրակը» ֆիլմը, որը պատմում է Միքայել Նալբանդյանի հեղափոխական գործունեության և ողբերգական ճակատագրի մասին։ Ֆիլմում հնչող երգերի հեղինակն ու կատարողն Արթուր Մեսչյանն է, ով խաղում է նաև  Միքայել Նալբանդյանի դերը։