Սերժ Սարգսյան-Ռոբերտ Քոչարյան շրջանակներում գործողներին «Ժառանգությունն» ասում է բարի ճանապարհ

«Բարգավաճ Հայաստան» կուսակցությանը չեմ առանձնացնում կոալիցիայից և չեմ բացառում, որ մոտ ապագայում նրանք կրկին կմտնեն կոալիցիա, քանի որ համոզված եմ, որ 2-րդ և 3-րդ նախագահները միասին են գործում»: Այս մասին լրագրողների հետ հանդիպմանն ասաց ԱԺ «Ժառանգություն» խմբակցության պատգամավոր Զարուհի Փոստանջյանը, հավելելով, որ լավ տեսողություն պետք չէ ունենալ Ռոբերտ Քոչարյանին ԲՀԿ-ի կողքին տեսնելու համար: 

Ընդդիմադիր պատգամավորի խոսքով՝ ԲՀԿ-ն դեռ պետք է կողմնորոշվի, թե որ դաշտում է գտնվում: ԲՀԿ-ի վերջին հայտարարությունը պաշտոնական տեսակետ չէ, այլ անհատի կարծիք է և, եթե դա պաշտոնական լիներ, ապա առաջարկվող դրույթները պետք է ներառված լինեին ԲՀԿ նախընտրական ծրագրում:

Ասուլիսի մյուս բանախոս ՀՀԿ պատգամավոր Հովհաննես Սահակյանի խոսքով՝ ինքն ուզում է քաղաքական խորհրդակցությունների մեջ դրական բան տեսնել, և այն, որ դա իսկապես հնարավորություն կստեղծի համախմբել ընդդիմադիր դաշտը։

«Այն պետք է լինի հանուն ինչ-որ բանի, ոչ թե ընդդեմ: Միասնական թեկնածուի մասին խոսք լինել չի կարող, քանի որ Րաֆֆի Հովհաննիսյանն ու Պարույր Հայրիկյանն իրենց առաջադրման մասին արդեն հայտարարել են»,-ասաց ՀՀԿ պատգամավորը:

Պատգամավորը կարծում է նաև, որ 100 տոկոս համամասնական ընտրակարգի հարցը պետք չէր հիմա բարձրացնել, քանի որ գնում ենք նախագահական ընտրությունների, ոչ թե խորհրդարանական:

Նույն թեմայի շուրջ Զարուհի Փոստանջյանն էլ նկատում է, որ Րաֆֆի Հովհաննիսյանն ազատամիտ քաղաքացիների միասնական թեկնածուն է:  Սերժ Սարգսյան-Ռոբերտ Քոչարյան շրջանակներում գործող քաղաքացիներին «Ժառանգությունն» ասում է բարի ճանապարհ: