Նոր էներգետիկ անվտանգության համակարգ Հայաստանում

Այսօր Ազգային անվտանգության խորհրդի քարտուղար Արթուր Բաղդասարյանի նախագահությամբ տեղի է ունեցել Հայաստանի Հանրապետության էներգետիկ անվտանգության հայեցակարգի նախագծի մշակման միջգերատեսչական աշխատանքային խմբի հերթական նիստը:

ԱԱԽ մամուլի ծառայությունից հայտնում են, թե էներգետիկ անվտանգության հայեցակարգի մշակումը նախատեսված է «Հայաստանի Հանրապետության ազգային անվտանգության ռազմավարությամբ»:

Կարևորելով էներգետիկ անվտանգությունը՝ որպես մեր երկրի ազգային անվտանգության բաղկացուցիչներից մեկը, Արթուր Բաղդասարյանը, նշել է, որ էներգետիկ անվտանգության հիմնական խնդիրը պետք է լինի Հայաստանի էներգետիկ ինքնաբավության մակարդակի ապահովումը թե կարճաժամկետ և թե երկարաժամկետ հեռանկարում:

Արթուր Բաղդասարյանի տեղեկացմամբ՝ Էներգետիկ անվտանգության հայեցակարգը արդեն մշակված է.

«Երկու տարվա աշխատանքի արդյունքում, միջգերատեսչական խմբի շրջանակներում, մշակել ենք Էներգետիկ անվտանգության ռազմավարությունը, որը մինչև այս տարվա ավարտը կքքնարկվի նաև Անվտանգության խորհրդի նիստում: Էներգետիկ անվտանգության ռազմավարությունը կարևորագույն փաստաթուղթ է մեր երկրի ազգային անվտանգության ապահովման տեսանկյունից' հաշվի առնելով նաև Հայաստանում և տարածաշրջանում տեղի ունեցող զարգացումները: Փաստաթուղթը, որի մեջ ներառված են շուրջ 120 առաջարկություններ, պատրաստ է քննարկման, իսկ դրա ընդունմամբ մենք շատ կարևոր քայլ ենք կատարում ոչ միայն մեր միջազգային պարտավորությունների կատարման տեսանկյունից, այլ նաև մեր Ազգային անվտանգության ռազմավարությամբ նախատեսված դրույթները կյանքի կոչելու առումով»:

Միջգերատեսչական աշխատանքային խումբը հավանության արժանացրեց Էներգետիկ անվտանգության հայեցակարգը և որոշում ընդունեց այն ներկայացնել Անվտանգության խորհուրդ հաստատման: