The New York Times. Օտար ինքնակալի արձանը Մեխիկոյի այգում «անհանգիստ նստած է»

Մեքսիկայի այգիներից մեկում Ադրբեջանի նախկին նախագահ Հեյդար Ալիևի արձանի տեղադրմանն անդրադարձել է ամերիկյան The New York Times պարբերականը՝ արձանն անվանելով «Օտար ինքնակալ»:

Ըստ պարբերականի՝ Ադրբեջանի ղեկավար Հեյդար Ալիևի արձանը Մեխիկոյին տրվել է որպես նվեր: Քննադատները, դատապարտելով այս ամենը, նշել են, որ այն չպետք է տեղադրվեր մի քաղաքում, որը հայտնի է իր ազատականությամբ և հպարտ է այդ ժառանգությամբ:
Մեխիկոյի քաղաքապետ Մարսելո Էմբրանդը, խոսելով արձանի մասին, հիացական գնահատականներ է տվել, որը, սակայն, Մեխիկոյի բնակիչների կողմից միանշանակ չի ընդունվել:

Ամերիկյան պարբերականի նշյալ հոդվածում մեջբերվում է, որ Էմբրանդի պաշտոնավարման ընթացքում այս քաղաքը դարձել է նոր արժեքների մայրաքաղաք, այն ավելի նմանվել է Սկանդինավյան մայրաքաղաքներից մեկին, քան Լատինամերիկյան մեգապոլիսի, որտեղ օրինականացվել է անգամ «միասեռականների միջև ամուսնությունը»: «Այն ազատության քաղաք է, որը որևէ կապ չունի դիկտատուրայի հետ:

Պարբերականը գրում է, որ ԱՄՆ-ի պետդեպարտամենտը բազմիցս նշել է, որ Ալիևի իշխանության օրոք Ադրբեջանում մարդու իրավունքների պաշտպանությունը, խոսքի ազատությունը սարսափելի իրավիճակում է, և որ երկրում ոտնահարվում են մարդու իրավունքների տարրական նորմերը, առկա են ժողովրդավարության լուրջ խախտումներ և ճնշումներ:

«Արձանի տեղադրումից մի քանի շաբաթ հետո իրավապաշտպանները, զանգվածային լրատվամիջոցների ներկայացուցիչները սկսեցին կոչ անել, որ արձանը հանվի քաղաքի կենտրոնից: Էմբրանդի կառավարության ներկայացուցիչները որևէ արձագանք չեն տվել նշյալ կոչերին:
Որպես խնդրի դիվանագիտական լուծում՝ Էմբրանդը, ով ցանկանում է 2018-ին դառնալ Մեքսիկայի նախագահ, հանձնաժողով է նշանակել, նշելով, որ այդ կերպ կքննարկի հանրության առաջարկները: Վերջինս փորձել է համոզել Մեքսիկայում Ադրբեջանի դեսպան Իլղար Մուխթարովին արձանը տեղափոխել մասնավոր մի տարածք, որը կարող է դառնալ Մեքսիկա-Ադրբեջան մշակութային կենտրոն:

Հ.Գ. Հարկ է նշել, որ Հեյդար Ալիևի նմանատիպ արձաններ արդեն որերրորդ տարին իր որդու նախաձեռնությամբ «նվեր»-ի տեսքով տեղադրվում են ՌԴ-ի մի շարք քաղաքներում, Ուկրաինայում, Թուրքիայում, Եգիպտոսում, Վրաստանում, Ռումինիայում, Սերբիայում:

Մնում է մտածել, որ Իլհամ Ալիևը կա՛մ իր հորը մերօրյա ԿՈՒՌՔ է կարծում և այն աղանդի պես փորձում տարածել աշխարհով, կա՛մ ստեղծված քանդակների քանակի ավելացում կա, և դրա համար իրացման գոտիներ է փնտրվում: