Անգրագետ մի՛ եղեք. Գալուստ Սահակյան

«Մենք բյուջեն քննարկում ենք պատասխանատվությամբ և հավատով, մյուսներն ամբողջ օրը թերթերում խոսում են, թե «հեսա գալիս ենք, հաղթելու ենք, որովհետրև ժողովրդի վիճակը սենց է»,-այս մասին Ազգային Ժողովում 2013 թվականի բյուջեի քննարկումների ժամանակ ասաց «Հայաստանի Հանրապետական» խմբակցության ղեկավար, ՀՀԿ փոխնախագահ Գալուստ Սահակյանը:

Վերջինիս խոսքերով՝ կային շատ ըմբռնողական, կառուցողական ելույթներ: «Ի՞նչ է պատահել, 2013 թվին կգաք, նոր բյուջեն կունենաք, ինչի՞ եք այդքան ծանրաբեռնված մեզ քննադատում: Նաև այս ամբիոնը կարծեք ոչ թե Ազատության հրապարակի հարթակ է դառել, այլ Կամսարականի ժամանակաշրջանի Չիբուխլուի տարածքի նման մի բան, հնչում են փնթի, երբեմն թափթփված ելույթներ»,-ասաց Սահակյանը, հավելելով, որ կա համով ընդդիմադիր, կա և անհամ, անալի ընդդիմախոս:

«Ես շատ ցավով եմ նշում, որ անընդհատ վանկարկում են, թե վարչապետը չեկավ, տո՛ ձեր ի՞նչ գործն է՝ եկավ, թե չեկավ: Կառավարությունն ինքն է որոշում, թե ինչպես պետք է ներկայացնի: Անգրագետ մի՛ եղեք, հիշե՛ք, թե բյուջեի քննարկումները ոնց են ացնում: Ելույթներ էլ կային, որոնք չէին քննադատում, պարզապես ցույց էին տալիս՝ «ես այնքան խելացի եմ, ինձ տեսե՛ք, հետագայում հաշվի կառնեք», դա էլ կանենք, բոլոր ելույթները հաշվի ենք առնելու, և հիմա գիտեմ, դուրս եկան ասելու են «մենք խոսեցինք, վախեցան, տեսաք՝ հաղթեցինք»:

Նման բան գոյություն չունի, մենք Ձեզ պարտվածներ չենք համարում, ընդամենը ասում ենք, որ բոլորս հայ մարդիկ ենք, կոռեկտ խոսե՛ք: Պարզապես չենք հակադարձում միայն մի պատճառով, որովհետև Ձեր նշած բարձունքներն այնքան հզոր և խրոխտ են, որ առանց հակադարձելու մի հայացքով, կարծում եմ, կոչնչացնեն Ձեր ամբողջ մի արգումենտներ կամ մոտեցումներ»,-ասաց ՀՀԿ փոխնախագահը: