Ամենամեծ «ֆեոդալը», ուրեմն, Քոչարյանն է. Աշոտ Աղաբաբյան

Աշոտ Աղաբաբյանը մեծամասնական ընտրակարգով խորհրդարան մտնող պատգամավորներից մեկն է: Աղաբաբյանը մեծամասնականով խորհրդարանում էր թե՛ երրորդ գումարման ժամանակ՝ 2003-2007թթ., թե՛ չորրորդ՝ 2007-2012, թե՝ այսօր: Այլ կերպ ասած, Աշոտ Աղաբաբյանը երկրորդ նախագահ Ռոբերտ Քոչարյանի մատնանշած «ֆեոդալ»-պատգամավորի դասական օրինակ է: Այս առումով հետաքրքիր էր լսել հենց իր՝ Աղաբաբյանի կարծիքն ու դիտարկումները մեծամասնական ընտրակարգի վնասակարության վերաբերյալ:

- Պարո՛ն Աղաբաբյան, երկրորդ նախագահը դեմ էր արտահայտվել մեծամասնական ընտրակարգին, ասելով, թե դա նպաստում է տարածքների ֆեոդալականացմանը: Դուք արդեն որերորդ գումարումն է՝ ընտրվում եք մեծամասնական ընտրակարգով: Ըստ Ռոբերտ Քոչարյանի տրամաբանության՝ Դուք, փաստորեն, տիպական «ֆեոդալ» եք: Դուք Ձեզ որպես «ֆեոդալ» զգու՞մ եք:

- Եթե վերցնենք մեծամասնականը գյուղական վայրերում, ֆեոդալի խնդիր չկա, որովհետև էդ ընտրատարածքը համոզվել է արդեն երրորդ տարին, որ իր ընտրած թեկնածուն երեք ընտրազանգվածներում էլ միշտ իրա կողքն է: Մարդը պարտադիր չի գնա, մտնի գյուղ, ասի՝ գյուղացինե՛ր, ո՞նց եք: Մարդը պիտի պարտավոր լինի գյուղացու որևիցե ահազանգը բանի տեղ դնել, վերաբերմունք ցույց տալ: Եթե դա ֆեոդալիզմ է, ուրեմն հարկավոր է անցնել ֆեոդալիզմի:

- Ձեր ընտրատարածքում Դուք երբևէ վախի մթնոլորտ չե՞ք ստեղծել, Ձեզանից չե՞ն վախենում: Այսպես ասած, «ֆեոդալական» կախվածություն կա՞ Ձեզնից:

- Ֆեոդալական հասարակությունը վախի հիման վրա չի ստեղծված: Ֆեոդալական հասարակարգը, եթե Դուք պատմություն գիտեք, դա աշխատողի և աշխատատեղ տվողի փոխհարաբերությունների ճիշտ, գիտական տարբերակն է: Ֆեոդալը ի՞նչ արեց, ֆեոդալը հավաքեց մի տարածք՝ բնակչությամբ, աշխատանք տվեց և իրար հետ սկսեցին աշխատել և ապրել:

- Դե՛, նույնը անում եք նաև Դուք՝ ըստ էության, եթե էդպես ընկալենք:

- Պարոն Քոչարյանի ասածների մեջ կան ճշմարտություններ, բայց դրանք նա չի, որ քննադատություն է, այլ նա է, որ ապրելակերպ է: Այդ ոճի ապրելակերպն այսօր, եթե արդարացնում է փոխհարաբերությունները գործատուի և գործարարի մեջ, դե, թող անցնե՛նք ֆեոդալական հասարակարգի, ի՞նչ կա:

- Հետո էլ այդ նույն հարաբերությունները եղել են նաև իր իշխանության օրոք, չէ՞: Դուք հաջողակ գործարար եղել եք հենց Ռոբերտ Քոչարյանի իշխանության տարիներին՝ նաև նրա տասնամյա կառավարման ընթացքում:

- Մինչև էդ:

- Այդ ժամանակ Դուք դարձյալ «ֆեոդալ» էի՞ք:

- Այսինքն իմ մեկնաբանություններից Դուք հասկացաք որ ես ֆեոդա՞լ եմ: Էդ ընտրատարածքը սեփականություն չի: Ես էդ ընտրատարածքի գործադիրը չե՛մ, ես էդ ընտրատարածքի ընդամենը սահմանադրական իրավունքները պաշտպանողն ե՛մ: Եվ հնարավորության դեպքում շահերը պահողն եմ: Եթե էդպես է, ինքն էլ մեծամասնականով ընտրված պրեզիդենտ ա, ուրեմն՝ ամենամեծ ֆեոդալը ինքն ա: Փաստորեն ամեն համայնքի ղեկավար ֆեոդալ ա՞:

- Բացի դրանից, չէ՞ որ համամասնականի մեջ էլ նույն «ֆեոդալները» կարող են տեղ զբաղեցնել:

- Ավելի շատ, քան մեծամասնակով: Գիտե՞ք ինչ, ես չեմ համարում, որ Քոչարյանը էդ ֆեոդալ բառը ասելուց ուրախացել ա: Միամիտ ասել ա, կրակն ա ընկել:

Լուսինե Կեսոյան