Սիրիացի ապստամբներն ամրացրել են իրենց դիրքերն Իսրայելի հետ սահմանին

Նվազագույնը 2 հարյուր սիրիացի ապստամբներ են դիրքավորվել Սիրիան Իսրայելից բաժանող Գոլանի բարձունքների ապառազմականացված գոտու մոտակա Բիևաջամ և Բարիքա գյուղերում. հաղորդում է The Daily Telegraph-ը:

Պարբերականը, հղում կատարելով երկրի հյուսիսում իսրայելական բանակի հրամանատարությունում գտնվող իր աղբյուրներին, գրում է. «Ապստամբներն ակնհայտորեն փորձում են սիրիական զորքերը պայքարի մեջ ներքաշել ապառազմականացված գոտում, քանի որ սիրիական բանակն այնտեղ չի կարող գործել ամբողջ ուժով գործող միջազգային սահմանափակումների պատճառով»:

«Ըդդիմադիրներն արդեն գրավել են Քունեյթրայից հարավ և հյուսիս գտնվող տարածքները: Եթե նրանց համարձակությունը բավականացնի, ապա կարող են արագ հնարքով կտրել քաղաքը Դամասկոսից՝ վերահսկողություն սահմանելով միակ ճանապարհի վրա: Մենք չենք բացառում, որ նրանք հենց այդպես էլ կվարվեն»,-հայտարարել է Telegraph-ի իսրայելցի զրուցակիցը: