Պատգամավորի թեկնածուները ԿԸՀ բողոքներ չեն ներկայացրել

Այս պահի դրությամբ կենտրոնական ընտրական հանձնաժողովը թիվ 1 և 35 ընտրատարածքների թեկնածուների կողմից որևէ դիմում (բողոք) չի ստացել: Այս մասին Լուրեր.com-ի հետ զրույցում ասաց ԿԸՀ մամլո խոսնակ Հերմինե Հարությունյանը:

Վերջինս նշեց նաև, որ դիմումներ (բողոք) չեն ստացվել նաև թիվ 1 և 35 ԸԸՀ-ներ:

Հիշեցնենք, որ Ավանի թիվ 1 ընտրատարածքում առաջադրվել է 4 թեկնածու՝ ՀՀԿ-ից՝ Ռոբերտ Սարգսյանը, «Ժառանգություն»-ից՝ Ստյոպա Սաֆարյանը, «Սոցիալ-էկոլոգիական դաշինքի» ղեկավար Արմենակ Դովլաթյանն ու «Ժողովրդական» կուսակցությունից ինքնաառաջադրված Էդուարդ Պետրոսյանը։

Գյումրիի թիվ 35 ընտրատարածքում գրանցված թեկնածուների թիվը երկուսն է, սակայն առաջադրվել էին երեքը, սակայն անկուսակցական Արման Խաչատրյանն ինքաբացարկ էր հայտարարել։ Դեկտեմբերի երկուսի ընտրություններում պատգամավորի աթոռի համար կպայքարեն ՀՀԿ-ի կողմից առաջադրված «Սովրանո» ՍՊԸ տնօրեն Արման Սահակյանը և ՀՀՇ-ից՝ Մուրադ Գրիգորյանը։

Նշենք նաև, որ թիվ 1 ընտրատարածքում մայիսի 6-ին մեծամասնական ընտրակարգով պատգամավոր էր ընտրվել ՀՀԿ-ական Ռուբեն Հայրապետյանը, իսկ թիվ 35 ընտրատարածքում՝ ԲՀԿ-ական Սամվել Բալասանյանը: Սամվել Բալասանյանն այժմ զբաղեցնում է Գյումրու քաղաքապետի պաշտոնը, իսկ Ռուբեն Հայրապետյանը մանդատը վայր դրեց «Հարսնաքար» ռեստորանում տեղի ունեցած միջադեպից հետո, որտեղ դաժան ծեծի էին ենթարկվել ռազմական բժիշկներ, իսկ Վահե Ավետյանը դաժան ծեծի արդյունքում միջադեպից մի քանի օր անց, գիտակցության չգալով, մահացավ։