Կան քաղաքական միավորներ, որոնք ստրկատիրական ժամանակահատվածի զարգացումներ են ապրում. Արմեն Աշոտյան

«Մի՞թե հնարավոր է ձևավորել ինքնուրույն քաղաքական օրակարգ, բայց ինքնուրույն քաղաքական բյուջե գրել հնարավոր չէ։ Զարմանում եմ: Ներուժ ունեցող քաղաքական ուժերի համար, կարծում եմ, երկու խնդիրներն էլ հաղթահարելի են»: Այս մասին այսօր Ազգային ժողովում ասաց ԿԳ նախարար Արմեն Աշոտյանը:

«Քաղաքական օրակարգ ասում են, հիշում եմ վերջին օրվա քննարկումները: Լավ, խոսում ենք 100-տոկոսանոց համամասնական ընտրակարգի կարևորության մասին, հարգելի՛ գործընկերներ, դա պահանջում է Սահմանադրության փոփոխություն: Ժողովրդի փոխարեն որոշումը կայացրել եք, որ դա իբր շատ ակտուալ թեմա է, գոնե բյուջետային առաջարկություն արեք հանրաքվեի ֆինանսական կողմն ապահովելու համար, եթե իրոք հավատում եք, որ 2013 թվականին նման հանրաքվե է լինելու նման օրակարգով:

Խոսում են մեր գործընկերների մասին՝ նրանց անվանելով ֆեոդալներ, գիտե՞ք, այստեղ էլ մի քիչ համաձայն եմ, մարդուց է կախված, թե նա ով է՝ համամասնականում լինի, թե մեծամասնականում: Խորհրդարանում կան, իհարկե, քաղաքական միավորներ, որոնք ստրկատիրական ժամանակահատվածի զարգացումներ են ապրում, կան նաև քաղաքական միավորներ, որոնք պոստ-ինդուստրիալ հասարակության արժեքներով և գործիքակազմով են ապրում. մարդուց է կախված, ոչ թե ընտրակարգերից»,-ասաց ԿԳ նախարարը:

Արմեն Աշոտյանը խոսեց նաև այն մասին, որ իրեն երբեմն մեղադրում են վիրտուալ քաղաքական քննարկումների համար. «Խնդրում եմ՝ իմ ազատության իրավունքները որևէ մեկը չսահմանփակի: Նախարարները նաև քաղաքական պաշտոնյաներ են, և՛ կարող են, և՛ պետք է ունենան քաղաքական տեսակետներ: Արտահայտվելու համար միջոցները տարբեր են, դուք պատիվ ունեք, փառք ունեք այստեղ աշխատելու և օգտագործելու այս ամբիոնը, մենք՝ կառավարությունը, նախարարներս ստիպված ենք դիմել այլընտրանքային նորարարական մեթոդների՝ սեփական քաղաքական կարծիքները հայտնելու համար»,-նշեց Աշոտյանը: