Եզդիների բաց նամակը ՀՀ վարչապետին

Եզդիների «Սինջար» ազգային միավորում հասարակական կազմակերպությունը բաց նամակ է հղել վարչապետ Տիգրան Սարգսյանին, որում մասնավորապես ասվում է. 

«Մենք անհանգստությամբ տեղեկացանք, որ այն դպրոցներում, որտեղ ժամանակին դասավանդվում էր եզդերեն, այժմ փորձ է արվում կամ արդեն դասավանդվում է քրդերեն: Այն, որ եզդերենն ու քրդերի մի մասի խոսակցական լեզուն նման են, կարծում ենք առիթ չէ դպրոցներից դուրս թողնել եզդերեն լեզուն և դասագրքերը, որտեղ նաև պատմվում է եզդի հերոսների մասին: Հայաստանի Հանրպետությունը մենք միշտ դիտարկել ենք որպես մեր երկրորդ հայրենիք, և այս երկրի համար մեռնելն անգամ մեզ համար պատիվ է համարվում: Աշխարհում միակ անվտանգ տեղն է Հայաստանը եզդիների գոյության համար, սակայն, եթե այլ երկրներում, մասնավորապես մեր հայրենիքում՝ Իրաքի հյուսիսում մենք ֆիզիկապես ենք ոչնչացվում: Եզդի երեխաներին քրդերենով (կորմանջի) դասավանդելը կլինի արդեն ոչ ֆիզիկական ոչնչացում (քրդացում) և այս դեպքում Հայաստանն էլ անվտանգ չի լինի եզդի ժողովրդի համար: Ուզում ենք հիշեցնել, որ Հայաստանում բնակվում է 1500 քուրդ և մոտ 50 000 եզդի՝ ըստ պաշտոնական տվյալների: Իրադարձություններից առաջ չընկնելով՝ գնահատական չենք տալիս կրթության նախարարության նման նախաձեռնությանը: Սակայն խնդրում ենք մի պահ պատկերացրեք, թե ինչ քայլերի կգնային օրինակի համար ՌԴ հայ համայնքի ներկայացուցիչները, եթե հայ մանուկներին դասավանդեին ադրբեջաներեն: Կարծում ենք՝ մեր մտահոգությունը Ձեզ ընկալելի կլինի և դուք համապատասխան քայլեր կձեռնարկեք խնդիրը կարգավորելու համար»: