Արմեն Գևորգյանն ընդունել է ՄԱԶԾ մշտական ներկայացուցչի պաշտոնակատարին

ՀՀ փոխվարչապետ, տարածքային կառավարման նախարար Արմեն Գևորգյանն այսօր ընդունել է Հայաստանում ՄԱԿ-ի զարգացման ծրագրի (ՄԱԶԾ) մշտական ներկայացուցչի ժամանակավոր պաշտոնակատար Պատրիս Կոր Բիզոյին:

Ողջունելով հյուրին` փոխվարչապետն անդրադարձել է ՄԱԶԾ-ի հետ ձևավորված արդյունավետ և բազմակողմանի համագործակցությանը: Նա առանձնահատուկ նշել է ՄԱԿ-ի երևանյան գրասենյակի օժանդակությամբ ու փորձագիտական աջակցությամբ Հայաստանում տարածքների համաչափ զարգացման խնդիրների ուսումնասիրման ուղղությամբ կատարվող աշխատանքները, ինչպես նաև տարբեր համայնքերում իրականացվող բազմաբնույթ ծրագրերը, որոնք ուղղված են սկսած ենթակառուցվածքների բարելավումից մինչև համայնքների կողմից մատուցվող ծառայությունների որակի բարձրացմանը:

Նա արդյունավետ է համարել նաև ՄԱԿ-ի տարբեր գործակալությունների հետ համատեղ աշխատանքները, ինչպես նաև կարևորել է ժամանակի մարտահրավերներին համահունչ ծրագրերի նախաձեռնումն ու իրականացումը:

Պատրիս Կոր Բիզոն իր հերթին ձևավորված փոխգործակցությունը շարունակելու պատրաստակամություն է հայտնել` վստահեցնելով, որ համագործակցության բարձր մակարդակը կպահպանվի: Նա հավաստիացրել է, որ ՄԱԶԾ -ի աջակցությամբ իրականացվող ծրագրերը կշարունակվեն` առանձնահատուկ կարևորելով տարածքների զարգացմանն ուղղված նախաձեռնությունները: