Սեմինարներ Հայաստանի պատմության թանգա­րա­նում

2011 թ. հունիսին Երևանում ստորագրվել է «ՀՀ մշակույթի նախարարության և Տոկիոյի մշակութային արժեքների ազգային հետազոտության ինստիտուտի միջև Հայաստանի մշակութային ժառանգության պահպանության վերաբերյալ» համաձայնագիրը և «Տոկիոյի մշակութային արժեքների ազգային հետազոտության ինստիտուտի և Հայաստանի պատմու­թյան թանգարանի միջև Հայաստանի պատմության թանգարանի հնագիտական մետաղյա առարկաների պահպանության և ուսումնասիրման նպատակով համագործակցության» փոխըմբռնման հուշագիրը: Համաձայն ստորագրված փաստաթղթերի՝ ս. թ. նոյեմբերի 7-17-ը, Հայաստանի պատմության թանգա­րա­նում իրականացվում է Հայաստանի պատմության թանգարանի հնագիտական բրոնզե առարկաների ուսումնասիրմանը և պահպանությանը նվիրված սեմինար: Սեմինարի նպատակն է երիտասարդ մասնագետներին նախապատրաստել հնագիտական մետաղյա առար­կաների պահպանության կազմակերպման գործընթացին` փաստաթղթավորումից մինչև համակարգչային հիշողության մեջ ներառելը:

«Բրոնզե առարկաների բուժում, պահպանում» սեմինարի համատեքստում, հայ մասնագետների համար անցկացվել են դասախոսություններ բրոնզե մասունքների բուժման, պահպանվածության ապահովման և տարբեր մեթոդների կիրառման վերաբերյալ: Սեմինարի գործնական մասը կշարունակվի Լճաշենից հայտնաբերված բրոնզե առարկաների մաքրման և ամրակայման աշխատանքների ուղղությամբ: Սեմինարին մասնակցում են` Հայատանի պատմության թանգա­րանի, «Էրեբունի» պատմահնագիտական արգելոց-թանգարանի, Մատենադարանի, Մշակութային ժառանգության պահպանության գիտահետազոտական ինստիտուտի, Հնագիտության և ազգագրության ինստիտուտի մասնագետները:

Հայաստանի պատմության թանգարանը և Տոկիոյի մշակութային արժեքների ազգային հետազոտության ինստիտուտը նոյեմբերի 21-28-ը Երևանում կազմակերպում են երկրորդ միջազգային սեմինարը, որի նպատակն է հնագիտական բրոնզե առարկաների պահպանության բնագավառում իրականացնել հայ և օտարերկյա մասնագետների գիտելիքների և փորձի փոխանակում /Հայաստան, Ռուսաստան, Վրաստան, Իրաք, Կիրգի­զիա, Ղազախստան, Ճապոնիա/:

Հայաստանի ազգային պատկերասրահի 9-րդ հարկի դահլիճում, նոյեմբերի 21-ին կանցկացվի «Հնագիտական բրոնզի ուսումնասիրու­թյուն» և «Պահպանության հայեցակարգեր և օրինակներ», իսկ նոյեմբերի 22-ին «Հնագիտական բրոնզյա առարկաների մաքրման և պահպանության էթիկան» թեմաներով բաց սեմինարներ: Նոյեմբերի 23-ին, 24-ին, 27-ին հայ և արտերկրի մասնագետները վերոնշյալ թեմաների շրջանակներում կանցկացնեն համատեղ քննարկումներ: