Սիրիահայերին աջակցող կազմակերպությունները

Սիրիայի Հանրապետությունում հակամարտության սկսվելուց ի վեր բազմաթիվ սիրիահայեր վերադարձան պատմական հայրենիք: Որպես հակամարտող երկրից եկողներ՝ նրանցից յուրաքանչյուրն ուներ ընդհանրական և անձնական բնույթի բազմաթիվ խնդիրներ, որոնց զգալի մասը ժամանակի ընթացքում գտան իրենց լուծումները: ՀՀ նախագահ Սերժ Սարգսյանի հանձնարարությամբ սիրիահայերի հիմնահարցերը մեր երկրում ՀՀ կառավարության բոլոր գերատեսչությունների ուշադրության կենտրոնում են: Սիրիահայերի տարաբնույթ հիմնախնդիրների լուծմանն իրենց աջակցությունն են բերել նաև համահայկական կառույցները, բազմաթիվ հասարակական կազմակերպություններ:

Մասնավորապես Հայկական բարեգործական ընդհանուր միությունը և Հայ օգնության միությունը, որոնց հանգանակած գումարները սկզբում նախատեսված են եղել Սիրիայում մնացած հայերի համար: Սակայն ՀՀ տեղափոխված հայերի խնդիրները հաշվի առնելով՝ երկու միություններն էլ որոշել են գումարի մի մասը հատկացնել Հայաստանում գտնվող սիրիահայերին: Աջակցության ծրագրեր են իրականացնում նաև՝ Մայր Աթոռ Սուրբ Էջմիածինը, Հայ Կաթողիկե Եկեղեցին, Հայ Ավետարանական Եկեղեցին, «Հայկական Կարիտաս» բարեսիրական կազմակերպությունը, «Օգնիր եղբորդ» կազմակերպությունը, «Սիրիահայերի հիմնախնդիրները համակարգող կենտրոն» հասարակական կազմակերպությունը:

Հայաստանում գտնվող սիրիահայերի տարատեսակ խնդիրներին և կարիքներին օժանդակելու պատրաստակամություն են հայտնել Համազգային հայ կրթական և մշակութային միությունը, ՀՄԸՄ «Հասկ»-ը, Հայ օգնության ֆոնդը, «Փյունիկ» մարդկային ռեսուրսների զարգացման համահայկական հիմնադրամը, «Հովարդ Կարագյոզյան» բժշկական բարեգործական հասարակական կազմակերպության Հայաստանի գրասենյակը, Հայաստանի մանուկներ հիմնադրամը, «Եկեղեցիների համաշխարհային խորհրդի հայաստանյան միջեկեղեցական կլոր սեղան» բարեգործական հիմնադրամը, Համաշխարհային հայկական կոնգրեսը, Իզմիրլյան բարեգործական հիմնադրամը, «Հովնանյան ինտերնեյշնլ» ընկերությունը, Սոցիալ-դեմոկրատական հնչակյան կուսակցությունը:

«Հայաստան» համահայկական հիմնադրամը նոյեմբերին կայանալիք համահայկական դրամահավաքի 10 տոկոսը նախատեսել է տրամադրել սիրիահայերի կարիքները հոգալուն: