Գ. Ծառուկյան. «Կարամ անձնապես կորցնեմ ունեցվածք, գումար, բայց ժողովրդի վստահությունը չեմ կորցնի»

ԲՀԿ առաջնորդ Գագիկ Ծառուկյանն այսօր Գյումրի այցելության ժամանակ «Հոկտեմբեր» կինոթատրոնի դահլիճում հանդիպեց ԲՀԿ ակտիվի եւ գյումրեցիների հետ: ԲՀԿ առաջնորդը բավականին ծավալուն ելույթ ունեցավ՝ շնորհավորելով գյումրեցիներին ինչպես նոր քաղաքապետ ունենալու, այնպես էլ նոր տրակտորներ ու մեքենաներ ստանալու առիթով: Այս մասին տեղեկացնում է Galatv–ն։

«Հարգելի գյումրեցիներ, ի սրտե շնորհավորում եմ ձեզ, մենք առաջին անգամ, երբ հանդիպեցինք քաղաքապետի քարոզարշավի ժամանակ, ես ձեզ բոլորիդ ասեցի, որ ես ոչ թե եկել եմ որևիցե բանի տեր դառնալու, ունեցվածք դիզելու կամ ինչ-որ ծրագրի համար, այլ եկել եմ ես այստեղ օգնելու, ասելու, ամրապնդելու այն վստահությունը, որ կա ձեր կողմից իմ հանդեպ: Դա պարտավորեցնող է, որ մարդ կարողանա պահել եւ պահպանել: Կյանքում ամենաթանկ բանը կայացած ունևոր մարդու համար վստահության հավատն է ժողովրդի: Եվ եթե մինչեւ այսօր էդ հավատը ես չեմ կորցրել, առավել եւս հիմա ձեզ վստահեցնում եմ, որ այդ վստահությունը չեմ կորցնի: Կարամ անձնապես կորցնեմ ունեցվածք, գումար, բայց ժողովրդի վստահությունը չեմ կորցնի»,-ասաց Գ. Ծառուկյանը:

«Եկել եմ այսօր ձեզ ասելու, որ, այո´, մեր խոսքը գործ է, եւ ինչ-որ ասել ենք, չի եղել մի բան, որ մի բան ասեմ եւ դա իրականություն չդարձնեմ: Հիշո՞ւմ եք, որ ձեզ ասեցի՝ մեր առաջին օգնությունը կլինի քաղաքապետարանին մեքենաներով օգնելը, այո´, պարոն Բալասանյան, ձեր աշխատանքի հետ, իմ առաջին խոստումը կատարել եմ: Իմ ուզածը մեկն է, որ այն քաղաքը, որը մեր հիշողությունների մեջ եզակի քաղաք է՝ իր հզորությամբ, ժողովրդի հումորով, ուշադրության կենտրոնում լինի, որ մարդիկ կարողանան ապրեն բարեկեցիկ կյանքով»:

Այնուհետեւ Գ. Ծառուկյանը խոսեց երկրի սոցիալ-տնտեսական խնդիրներից ու արտագաղթից: «Խի՞ են գնում՝ աշխատանք չունեն, կամ աշխատանք ունեն՝ գումարը քիչ է: Ուրեմն պետք է էնպես լինի, որ ինչքան գնաճը բարձրանում ա, աշխատավարձն ու թոշակն էլ բարձրանան: Ոչ ոք չի ուզում տուն մտնելուց գլուխը կախի իր ծնողի առաջ, իր կնոջ առաջ, ուզում է արժանապատիվ աշխատել եւ իր տունը պահել: Ասում են՝ 30 տոկոսը աղքատ են, իսկ մնացած 70-ը հարո՞ւստ են: 40 տոկոսն էլ ստանում է 40 հազար դրամ, 40 հազարը համարում են բավարա՞ր ապրելու համար, այդ բավարար համարողը թող ինքը իր ընտանիքով էդ 40 հազար դրամով ապրի, որ նոր հասկանա՝ ինչ է դա նշանակում: Հիմնական խնդիրն այն է, որ ծրագիր կամ բյուջեն կազմելու համար ոչ թե պետք է վերեւից նայեն, ոչ թե թղթերի վրա պետք է ասեն, որ Գյումրին ինչ-որ կենտրոն են սարքելու, այլ պետք է այդ ծրագիրը իրականություն դարձնեն, որ ժողովուրդն իրեն խաբված չզգա»:

Ծառուկյանի խոսքերով՝ իր ուզածը միայն այն է, որ ժողովրդի մասին մտածող լինի, որ իշխանություններն իրենց պատկերացնեն ժողովրդի փոխարեն եւ ապահովեն աշխատատեղերով : «Ժողովուրդը ոչ նպաստ ա ուզում, ոչ էլ օգնություն, այլ ժողովուրդն ուզում է պայման, աշխատանք, հնարավորություն… Մեր ուզածն էլ սա է, մենք ոչ պաշտոն ենք ուզում, ոչ ոլորտ ենք ուզում, ոչ էլ ինչ-որ ուրիշ գումար վաստակել ենք ուզում: Աստծո կամոք, մենք ոչ պետական պաշտոնում ենք եղել, ոչ էլ ուզում ենք լինել, ոչ էլ ինչ-որ ոլորտ լինի, կամ մենաշնորհ լինի, մենք ուզում ենք, որ ժողովրդի դեմքին ժպիտ լինի եւ ժողովուրդը երկրից չթողնի-գնա, որովհետեւ այսօր գնալով ժողովրդի վիճակն է´լ ավելի վատանալու է: Ավել-պակաս խոսում են, մարդիկ 100 դոլար փող չեն ունեցել, մտել են քաղաքականության մեջ, այսօր 4-5 հատ տներ ունեն, բիզնես ոլորտ, ազգ ու տակին տեղավորելով, մեծ-մեծ խոսում են ժողովրդից, պետությունից, պետականությունից: Էսօր բոլորս էլ հասկանում ենք»,-հայտարարեց ԲՀԿ առաջնորդը: Նա ասաց նաեւ, որ ԲՀԿ-ն «մտել է ծանրության տակ», եւ նպատակը մեկն է, որ ժողովրդի վստահությունն ու հավատը չկորցնեն: Հենց այդ գիտակցությամբ էլ ԲՀԿ-ն առաջարկել է Ս. Բալասանյանի թեկնածությունը Գյումրու քաղաքապետի պաշտոնում:

«Բալասանյանի թեկնածությունը Գյումրիում ներկայացնելով, իհարկե, մենք հասկանում էինք, որ պատասխանատու քայլ է: Իմանալով, որ Բալասանյանը ունեւոր, կայացած մարդ է ու ցանկություն ունի աշխատելու, իր էղածից էլ ներդնելու է՝ ժողովրդի համար ու պատմության մեջ անցնելու»: ԲՀԿ առաջնորդը խոստացավ, որ ԲՀԿ-ն եւ անձամբ ինքը Ս. Բալասանյանի կողքին են լինելու եւ աջակցելու, օգնելու են նրան, որպեսզի ժողովուրդն իրեն խաբված չզգա: «Ամեն մարդ իրեն պտի դնի դիմացինի տեղը: Եթե քեզ խաբում են, խաբված մարդը ո՞նց կարա հավատա: Պարոն Բալասանյան ջան, հանկարծ քաղաքական չսարքես քաղաքապետարանը, որ ասենք «Բարգավաճ» չէ, անպայման մտնի, մենք այդպիսի սկզբունք չունենք: Մարդը, թեկուզ ընդդիմություն, աշխատում ա տվյալ ոլորտում, կամ անկուսակցական ա, եթե աշխատանքը բարեխիղճ կատարում ա, ոչ ոք բարոյական իրավունք չունի նրան պարտադրելու, որ հուսախաբ լինի մարդը: Քո աշխատանքով ու սկզբունքով էնպես աշխատես, որ մարդը հավատա եւ ցանկանա քո կողքին լինել: Մենք ասում ենք, որ քաղաքապետի կողքին ենք, ամեն ինչով աջակցելու, օգնելու ենք, օրենք, ծրագրեր ներկայացնելու եւ մեր հաշվին իրական ենք դարձնելու»,-ասաց Գ. Ծառուկյանը:

Իր ծավալուն ելույթի վերջում Գ. Ծառուկյանը Ս. Բալասանյանին մաղթեց առողջություն, հաջողություն եւ նպատակների իրականացում: «Վստահելով 65 տոկոս քվե տվեցիք, շնորհակալ եմ, նույնը՝ նաեւ խորհրդարանական ընտրությունների ժամանակ…կանենք ամեն ինչ ձեր վստահությունը պահելու համար: Որ դուք ձեր հարաբերությունների մեջ խաբված չզգաք, բարձր տրամադրություն, եւ ամեն ինչ կամաց-կամաց լավ է լինելու, մենք միասնական բոլոր խնդիրները լուծելու ենք եւ ձեր կողքին ենք»,-վստահեցրեց Գ. Ծառուկյանը դահլիճում հավաքված գյումրեցիներին: