Հայաստան-Լիտվա՝ 4-2. ռևանշը կայացավ

«Հանրապետական» մարզադաշտում վայրկյաններ առաջ ավարտված ընկերական հադիպմանը Հայաստանի հավաքականը 4-2 հաշվով պարտության մատնեց Լիտվայի ընտրանուն:

Չնայած մեր թիմի կազմում առաջատար մի շարք ֆուտբոլիստներ վնասվածքների պատճառով բացակայում էին, այնուամենայնիվ, Վարդան Մինասյանի սաներին հաջողվեց ռևանշի հասնել մրցակցի նկատմամբ: Հիշեցնենք, որ անցած տարի Լիտվայում այս հավաքականների հանդիպումն ավարտվել էր տանտերերի հաղթանակով՝ 3-0 հաշվով։

Հանդիպման առաջին խաղակեսում գրանցվեց մեկ գոլ. 7-րդ րոպեին գոլn իր հաշվին գրանցեց Էդգար Մանուչարյանը: Առաջին խաղակեսում տեղի ունեցավ նաև նախկին ավագ Սարգիս Հովսեփյանի պաշտոնական հրաժեշտը ազգային հավաքականին: Ընդմիջման ժամանակ, ինչպես արդեն նշել ենք, Սարգիս Հովսեփյանին ՀՖՖ-ն ավտոմեքենա նվիրեց, իսկ Երևանի քաղաքապետարանը պարգևատրեց քաղաքապետի ոսկե մեդալով:

Երկրորդ խաղակեսում մեր հավաքականը ևս երեք գնդակ ուղարկեց Լիտվայի դարպասը՝ սեփականն ընդունելով 2-ը։

Նախ 50-րդ րոպեին Կառլեն Մկրտչյանը հաշիվը դարձրեց 2-0։ 5 րոպե անց Մխիթարյանը եռապատկեց հաշիվը: 63-րդ րոպեին լիտվացիներին հաջողվեց կրճատել հաշվի տարբերությունը. գոլի հեղինակ դարձավ Արտուրաս Ռիմկևիչյուսը: 68-րդ րոպեին Արաս Օզբիլիսի գեղեցիկ հարվածից հետո լիտվացիները ստիպված եղան չորրորդ անգամ գնդակը հանել սեփական դարպասից:

Սակայն երեք գոլի առավելությունը մեր թիմին պահպանել չհաջողվեց։ Մրցավարը 11 մետրանոց նշանակեց Հայաստանի դարպասին, որն էլ օգնեց Ռիմկևիչյուսին դուբլ ձևակերպել:

Հայաստանը, տպավորիչ խաղ ցուցադրելով, հաղթեց 4-2 հաշվով։