Երգչուհի Լիլուի՝ ոստիկանությանն ուղղված մեղադրանքն անհիմն է. ՀՔԾ

ՀՀ ոստիկանություն բերման ենթարկված երգչուհի Լիլուի, նույն ինքը Լիլիթ Ղուկասյանի կողմից հասարակական կարգի խախտման առնչությամբ քննությունը կշարունակի ոստիկանության Կենտրոնականի քննչական բաժինը: Այդ մասին Pastinfo.am-ին տեղեկացրեցին ՀՀ գլխավոր դատախազությունից։

Օրեր առաջ պարզ դարձավ, որ երգչուհու գործն ուղարկվել է հատուկ քննչական ծառայություն, քանի որ վիճարկվում էր ոստիկանների գործողությունների օրինականությունը՝ երգչուհուն բերման ենթարկելու ընթացքում։ Սակայն ինչպես տեղեկացրեցին դատախազությունից, հատուկ քննչական ծառայությունում մերժվել է ոստիկանների նկատմամբ քրեական գործի հարուցումը, քանզի պարզել են, որ վերջիններս գործել են իրենց լիազորությունների սահմաններում և նրանց գործողություններում չկա հանցակազմ, իսկ Լ. Ղուկասյանի կողմից հասարակական կարգը խախտելու վերաբերյալ նյութերն այսօր դատախազությունը ուղարկել է ոստիկանություն, քանզի հասարակական կարգի խախտման վերաբերյալ գործերն ընդդատյա են հենց ոստիկանությանը։

Հիշեցնենք, որ ինչպես ավելի վաղ հայտնել էր Lurer.com–ը, հոկտեմբերի 22-ին՝ ժամը 07.45-ին, ոստիկանության Երևան քաղաքի վարչության ծառայողները Մաշտոցի պողոտայի թիվ 20 հասցեի մոտից բերման են ենթարկել երգչուհի Լիլուին և Կ. Պ.-ին, որոնք նույն օրը՝ ժամը 06.00-ին, հասարակական կարգի կոպիտ խախտմամբ բացահայտ անհարգալից վերաբերմունք դրսևորելով հասարակության նկատմամբ՝ «Նիսան» մակնիշի ավտոմեքենայում բարձր երաժշտություն միացրած՝ մեծ արագությամբ երթևեկել են Հյուսիսային պողոտա, այնուհետև Տերյան և Ամիրյան փողոցով շարժվել դեպի Մաշտոցի պողոտա և ոստիկանների կողմից արված դիտողությանը պատասխանելով հայհոյանքներով՝ չեն ենթարկվել նրանց օրինական պահանջներին։