Մենք ճանաչում ենք մեր հաճախորդներին

Վարչապետ Տիգրան Սարգսյանն այսօր Ազգային ժողովում ճեպազրույցի ժամանակ հետաքրքիր բացահայտում արեց: Լրագրողների հարցին, թե հավանական համարում եք, որ ՀԱԿ-ն ու ԲՀԿ-ն միասնական թեկնածու ունենան նախագահական ընտրություններում, Սարգսյանը պատասխանեց. «Քաղաքական դաշտում ես ոչինչ չեմ բացառում, բայց դրա հավանականությունը համարում եմ փոքր, որովհետև ես նայում եմ մեր կուսակցությունների անցած ճանապարհը։ Մենք միասին ճանապարհ ենք անցել, միմյանց լավ ճանաչում ենք, գիտենք, թե ինչ արժեքների շուրջ է տեղի ունենում մեր համախմբումը, ովքեր են այդ գաղափարների կրողները, և այդպիսի կտրուկ շրջադարձը քաղաքականության մեջ ավելի քիչ հավանական է, քան այն գործելակերպը, որը կար նախկինում՝ իհարկե չբացառելով, որ կարող է նաև այլ սցենար ևս զարգանալ»:

Հայաստանի քաղաքական դաշտում իսկապես բոլորը բոլորին ճանաչում են: Օրինակ, նույն Տիգրան Սարգսյանն իր քաղաքական կարիերայի արշալույսին թունդ ընդդիմադիր էր ԱԺՄ-ից: ԱԺՄ-ն քննադատում էր իշխանություններին՝ ի դեմս ՀՀՇ-ի, իսկ Սերժ Սարգսյանն այդ տարիներին ուժային կառույցներում տարբեր պաշտոնների էր: Ի՞նչ դիրքերում են Սերժ և Տիգրան Սարգսյաններն այսօր: Զարմանալի ոչինչ չկա՝ չէ՞ որ մարդիկ միմյանց ճանաչում են և հասկանում, թե հանուն ինչ արժեքների կարելի է համախմբվել: Ըստ երևույթին, հենց այդ արժեքներն օգնեցին նաև ԱԺՄ ղեկավար Վազգեն Մանուկյանին՝ համախմբվել ու ստանձնել Հանրային խորհրդի նախագահի պաշտոնը: Նույն արժեքները ստիպեցին լռել անգամ վարչապետ Սարգսյանի նախկին կուսակից Արշակ Սադոյանին և էներգիան ուղղորդել դեպի նույն Հանրային խորհուրդ:

ԲՀԿ-ն ու ՀԱԿ-ն այսօր ինտենսիվ բանակցությունների մեջ են: Նաիրա Զոհրաբյանն ու Լևոն Զուրաբյանը դարձել են անբաժան ու մտերիմ ընկեր-գործընկերներ: Մշտապես իրար հետ հարցեր են քննարկում, ինչ-որ բաներ ճշտում, աշխատում: ԲՀԿ-ն այսօր հայտարարում է, թե ինքն այլընտրանք է իշխանությանը, ՀԱԿ-ն ընդդիմադիր դիրքերում է, այսինքն՝ երկուսի նպատակն էլ իշխանության հասնելն է: Կարո՞ղ է իշխանության հասնելը դառնալ արժեք, այնպիսի արժեք, որի շուրջ տեղի ունենա այս քաղաքական ուժերի համախմբումը: Ըստ էության, կյանքը ցույց է տալիս, որ քաղաքական դաշտում համախմբումների հիմնական նպատակը հենց իշխանությունն է: Տիգրան Սարգսյանը հենց հանուն իշխանության էր, որ կարողացավ կողմնորոշվել, վերարժեքավորել իր արժեքները, որից հետո նշանակվեց Կենտրոնական բանկի նախագահ, հետո էլ՝ վարչապետ:

Լուսինե Կեսոյան