Դրամահավաք և ստորագրահավաք՝ «Փուչիկների գործով» մեղադրյալի համար

Հրապարակախոս Զարուհի Հովհաննիսյանը Լուրեր.com-ի հետ զրույցում ասաց, որ Սերոբ Բոզոյանին օգնելու համար հավավքվել է 136.000 դրամ։

«Գումարը փոխանցել եմ Սերոբ Բոզոյանի կնոջը՝ Մարինային, բայց քանի որ նրա անձնագիրը ժամկետանց էր, այն հանձնվել է ոստիկանություն. մինչև երկարաձգեն, մենք նրա անունով կբացենք նոր հաշվեհամար, օգնել ցանկացող քաղաքացիները կարող են գումար հատկացնել»,-ասաց Հովհաննիսյանը։

Հովհաննիսյանը նշեց, որ Սերոբ Բոզոյանն օնկոլոգիական հիվանդ է, գտնվում է հաշվառման մեջ։ Նա զրուցել է Բոզոյանի փաստաբանի հետ, ով նշել է, որ հիվանդը շատ ծանր վիճակում է։

«Այս պահին փաստաբանը հետաքրքրվում է, թե ինչու են ընդհանրապես իրենից գումար վերցրել, քանի որ չպետք է վերցնեին»,–ասաց Հովհաննիսյանը։

Նա նշեց, որ մայիսի 4-ին Հանրապետության հրապարակում ՀՀԿ-ի նախընտրական հավաքի օրը տեղի ունեցած պայթյունից տուժածները ստորագրահավաք են սկսել՝ ի պաշտպանություն Սերոբ Բոզոյանի։

«Վերաքննիչ դատարան բողոքը ներկայացնելուն զուգահեռ ներկայացվելու են նաև տուժածների ստորագրությունները, որոնք խնդրելու են փոխել վճիռը։ Նրանք համարում են, որ այդ մարդու պատժամիջոցն այնքան էլ ճիշտ չէ և իրենք աջակցում են այդ մարդուն»,–ասաց Հովհաննիսյանը։  

Հիշեցնենք, որ մայիսի 4-ին ՀՀԿ-ի համերգ-հանրահավաքի ժամանակ փուչիկների պայթյունի և հարյուրավոր երիտասարդների մարմնական վնասվածքների գործով մեղավոր ճանաչված Սերոբ Բոզոյանին օգնելու համար օրեր առաջ ՀՀ քաղաքացիները դրամահավաք են սկսել: