Օբաման հրաժարվել է ճանաչել սիրիական ընդդիմությունը որպես վտարված կառավարություն

ԱՄՆ-ի ադմինիստրացիան դեռ պատրաստ չէ ճանաչել սիրիական ընդդիմությունը որպես «վտարված կառավարություն», թեպետ ողջունում է ընդդիմադիր և հեղափոխական ուժերի ազգային կոալիցիայի ստեղծումը. այս մասին հայտարարել է ԱՄՆ-ի նախագահ Բարաք Օբաման։

«Ես ոգևորված եմ այն հանգամանքով, որ ընդդիմությունը ստեղծել է ընդհանուր խումբ, որը կարող է ավելի միասնական դառնալ, քան առաջ։ Մենք բանակցություններ կվարենք այս խմբի հետ, մեր ներկայացուցիչները քննարկումներ կանցկացնեն համաշխարհային հանրության անդամների և ընդդիմության հետ»,-նշել է նախագահը։ Միևնույն ժամանակ նա ընդգծել է, որ Վաշինգտոնը «դեռ պատրաստ չէ ճանաչել սիրիական ընդդիմությունը որպես վտարված կառավարություն». գրում է ИТАР-ТАСС-ը:

«Մենք ենթադրում ենք, որ սա ներկայանալի կազմակերպություն է։ Հարցերից մեկը, որի վրա մենք պատրաստվում ենք սևեռել մեր ուշադրությունը, ընդդիմության՝ ժողովրդավարական Սիրիայի գաղափարին հարելն է»,-նշել է Օբաման։

Անդրադառնալով Բաշար ալ Ասադի հակառակորդներին զենք մատակարարլեւ թեմային՝ Օբաման խոստովանել է, որ «ծայրահեղական էլեմենտները ներթափանցում են ընդդիմության շարքեր»։

«Մենք ուզում ենք վստահ լինել, որ անուղղակի կերպ չենք զինում մարդկանց, որոնք ամերիկացիներին վնաս կհասցնեն»,-ասել է նա։ Միևնույն ժամանակ Օբաման կիսել է Իսրայելի «լուրջ մտավախությունները»՝ կապված Սիրիայում «քիմիական զենքի տեղափոխման» հետ։ Նրա խոսքերով՝ «նրանք կարող են տեղ գտնել նման քաոսում և ազդել իրավիճակի վրա ոչ միայն Սիրիայում, այլև ամբողջ տարածաշրջանում»։