Կառավարությունում կրկին պանրի հարցն է

Կառավարության այսօրվա նիստում ՀՀ վարչապետ Տիգրան Սարգսյանը կրկին անդրադարձավ սննդի անվտանգության ծառայության կողմից պանրի ոլորտում արված ուսումնասիրություններին: Վարչապետի խոսքերով՝ այս խնդրին անդրադարձը պարբերաբար լինելու է։

«Մեզ դիմել են նաև պանրագործներ, որոնք այսօր ապահովում են ստանդարտներին համապատասխան պանրի արտադրություն և դժգոհություն են հայտնում այն պանրագործների նկատմամբ, որոնք փորձում են խուսափել պատասխանատվությունից: Մեր նպատակը հետևյալն է՝ մեր սեղաններին վտանգավոր սննդամթերք չպետք է լինի: Մենք խստացրել ենք վերահսկողությունը և նահանջ այս դաշտում չի լինելու ոչ մի պատճառաբանություններով, մենք թույլ չենք տալու, որ առողջության համար վտանգավոր պանիր հայտնվի հայկական ընտանիքների սեղանին:

Սա մեզ համար անթույլատրելի է, և որևիցե ճնշում այդ առումով մեր վրա չի ազդելու, հակառակը՝ մենք խստացնելու ենք հսկողությունը սննդի անվտանգության նկատմամբ: Մենք հետ չենք նահանջելու և խստացնելու ենք վերահսկողությունը»,-ասաց վարչապետը:

Հիշեցնենք, որ կառավարության նախորդ նիստի ժամանակ սննդի անվտանգության պետական վարչության պետ Աբրամ Բախչագուլյանը ներկայացրեց պանրի ոլորտում արված ուսումնասիրությունները:

Ստուգումները կատարվել են թվով 59 տնտեսվարող սուբյեկտների մոտ։ Ստուգումների արդյունքում թվով 18 տնտեսվարող սուբյեկտի գործունեությունն արգելվել է՝ առանձին արտադրության կամ ամբողջ արտադրության կտրվածքով:

Սննդի անվտանգության պետական ծառայությունը հրապարակել է վերոնշյալ 18 տնտեսավարողների ցանկը: