Գագիկ Բեգլարյան. Վարորդները հաճախ աշխատում են օրական 8 ժամից ավել տևողությամբ

Կառավարության այսօրվա նիստում Հայաստանի Հանրապետության տրանսպորտի և կապի նախարար Գագիկ Բեգլարյանը ներկայացրեց նախարարության հարկային պարտավորությունների կատարման և տնտեսական աճի ներուժի վերաբերյալ հաշվետվությունը:

Ըստ Բեգլարյանի՝ 2012 թվականի 9 ամիսների ընթացքում ՀՀ պետական բյուջեի եկամուտների պլանը նախարարությանը վերագրվող մասով գերակատարվել է 156.9 մլն. դրամով, որի արդյունքում պետական բյուջե է մուտքագրվել շուրջ 637.0 մլն. դրամ (պլան 480.0 մլն. դրամ), որը նախորդ տարվա նույն ժամանակաշրջանի համեմատ կազմում է 90.5 %:

«Եկամուտների փաստացի ծավալի նվազեցման պատճառն այն է, որ 2011 թվականի տրանսպորտային միջոցների տեխնիկական զննության համապատասխան նմուշի փաստաթուղթ տրամադրելու իրավասությունը, բացի կանոնավոր ուղևորափոխադրումներ իրականացնող տրանսպորտային միջոցներից, վերապահվել է ՀՀ ֆինանսների նախարարությանը: Մինչև տարեվերջ ըստ կանխատեսումների պետական բյուջե կմուտքագրվի ևս շուրջ 160.5 մլն. դրամ, որի արդյունքում մուտքերի պլանը կգերակատարվի 17.9%-ով:

Նախարարության համակարգում գործում են 10 կազմակերպություններ, այդ թվում 5 ՓԲԸ, 4 ՊՈԱԿ և 1 հիմնարկ (ԾԻԳ), որոնց կողմից կատարած աշխատանքների և մատուցած ծառայությունների դիմաց ստացված եկամուտները նախորդ տարվա 9 ամսվա համեմատ աճել է 2.5 %-ով և կազմել 1906.0 մլն. դրամ, իսկ փաստացի վճարված հարկերի գումարը կազմել է 405.3 մլն. դրամ, այդ թվում ԱԱՀ՝ 247 մլն. դրամ, շահութահարկ՝ 54.7 մլն. դրամ, որը նախորդ տարվա համեմատ նվազել է 0.5 %-ով: Նշված ժամանակաշրջանում աշխատողների միջին ցուցակային թիվը նվազել է 3,1%-ով և կազմել 1360 մարդ, իսկ սոցիալական ապահովագրության վճարները նվազել են 4.1 %-ով և կազմել 307,1 մլն. դրամ:

Մինչև տարեվերջ ըստ կանխատեսումների կվճարվեն շուրջ 135,1 մլն. դրամի հարկեր և 102,3 մլն. դրամի սոցիալական վճարներ»,-ասաց նախարարը:

Խոսելով նախարարությունում առկա հիմնախնդիրների մասին՝ Գագիկ Բեգլարյանն ասաց. «Տրանսպորտի ոլորտում ցածր աշխատավարձերի պատճառով ցածր է մնում եկամտահարկի և սոցիալական ապահովության վճարների մակարդակը: Բացի դրանից, ուղևորատար տրանսպորտի վարորդները հաճախ աշխատում են օրական 8 ժամից ավելի տևողությամբ, իսկ զգալի թվով հարկ վճարողների մոտ միջին ամսական աշխատավարձը ցածր է 40 հազ. դրամից, որի արդյունքում փոխադրումների անվտանգության ռիսկերի բարձրացումից բացի չեն հավաքագրվում նաև համապատասխան չափի եկամտահարկ և սոցիալական ապահովագրության վճարներ:

Ըստ ՊԵԿ-ի տվյալների՝ շահութահարկի գծով մուտքերը 2012թ.I-ին կիսամյակում 2011 թ. I-ին կիսամյակի համեմատությամբ նվազել է 42 %-ով կամ 1.0 մլրդ. դրամով, ինչը թույլ է տալիս ենթադրել, որ ոլորտում նկատվում է նաև ծախսերի ավելացում, իսկ շրջանառության մի զգալի մասը դուրս է մնում հաշվառումից: Առաջարկվում է ուժեղացնել պետական հսկողությունը հարկային և աշխատանքային օրենսդրության պահանջների կատարման նկատմամբ:

Նախարարությունը կարող է հորդորել ոլորտի կազմակերպություններին՝ հարկային պարտավորությունները ժամանակին կատարելու և ապառքների աճ թույլ չտալու համար և համապատասխան օրենսդրական փոփոխություններ կատարելու դեպքում նշված պարտավորությունները չկատարողների նկատմամբ կարող է կիրառել լիցենզիայի կասեցման գործընթաց:

Կապի ոլորտում, ըստ ՊԵԿ-ի տվյալների, 2011 թվականին 2010 թ. համեմատությամբ շահութաբերության մակարդակը նվազել է 5.5%-ով, որն արդյունք է ոչ թե եկամուտների նվազման, այլ «հայտարարագրված ծախսերի» չափի ավելացման: Սա վկայում է այն մասին, որ տվյալ շուկայում մրցակցության ուժեղացման պայմաններում ավելացվել են մատուցվող ծառայությունների ծավալները և դրանց հետ կապված ծախսերը, իսկ սակագները նվազել են, որի արդյունքում հարկ վճարողները սկսել են աշխատել նվազ շահութաբերությամբ՝ ընդլայնելով ծառայությունների ծավալները, ընդ որում ըստ նախարարության տվյալների 2012 թվականի 9 ամսում ոլորտի կողմից վճարված հարկերի ծավալն աճել է 12.5%-ով: Առ 01.10.2012թ. ոլորտի կազմակերպությունների գծով առկա է շուրջ 23.5 մլրդ. դրամի չափով հարկային պարտավորությունների առաջանցիկ վճարումներ:

Պետական նշանակության ճանապարհները որպես պետական սեփականություն գրանցելու դեպքում, որի համար համապատասխան բյուջետային հայտ է ներկայացվել Հայաստանի Հանրապետության ֆինանսների նախարարություն, հնարավորություն կընձեռնվի պետական բյուջեն համալրել լրացուցիչ մուտքերով՝ տարածքների վարձավճարներից, բացի դրանից պետություն – մասնավոր համագործակցության արդյունքում զգալիորեն կբարելավվեն սպասարկման ծառայությունները ճանապարհամերձ հատվածներում»: