Կարեն Ավագյանը բարձր է գնահատում «Փուչիկների գործով» մեղադրյալի համար կազմակերպված դրամահավաքը

Լուրեր.com-ի հետ զրույցում ՀՀԿ պատգամավոր Կարեն Ավագյանը, անդրադառնալով այն հարցին, թե ինչպես է վերաբերվում այն հանգամանքին, որ քաղաքացիները դրամահավաք են սկսել Սերոբ Բոզոյանին օգնելու համար։

«Եթե կա քաղաքացիական-հասարակական նախաձեռնություն, դա նորմալ է։ Որևէ խնդիր չկա։ Բացի բարձր գնահատականներից՝ այլ գնահատական չկա»,-ասաց Ավագյանը։

Անդրադառնալով այն հանգամանքին, որ Վերաքննիչ դատարան բողոքը ներկայացնելուն զուգահեռ ներկայացվելու են նաև տուժածների ստորագրությունները, որոնք խնդրելու են փոխել Բոզոյանի վճիռը, Կարեն Ավագյանն ասաց. «Ես միշտ խուսափում եմ իրավական գործընթացների մասին խոսելուց, որևէ կարծիք հայտնելուց, որովհետև դա ամբողջությամբ իրավական գործընթաց է»։

Հիշեցնենք, որ մայիսի 4-ին ՀՀԿ-ի համերգ-հանրահավաքի ժամանակ փուչիկների պայթյունի և հարյուրավոր երիտասարդների մարմնական վնասվածքների գործով մեղավոր ճանաչված Սերոբ Բոզոյանին օգնելու համար օրեր առաջ ՀՀ քաղաքացիները դրամահավաք են սկսել: Պայթյունից տուժած անձինք նաև ստորագրահավաք են սկսել Սերոբ Բոզոյանի պաշտպանության համար։