Մայրաքաղաքում իրականացված շինարարության և բարեկարգման աշխատանքները

Երևանի քաղաքապետարանի աշխատակազմի շինարարության և բարեկարգման վարչության պետի տեղակալ Ֆելիքս Յայլոյանը լրագրողների հետ հանդիպման ժամանակ ներկայացրել է Երևանի քաղաքապետարանի 2012 թվականի ծրագրերով մայրաքաղաքում իրականացված շինարարության և բարեկարգման աշխատանքները:

Նշվել է, որ այս տարվա ծրագրերով մայրաքաղաքում կատարվել է 2 մլն քմ ընդհանուր ծավալով ասֆալտապատում: Հիմնանորոգվել է 40 փողոց, ուր ոչ միայն վերականգնվել է ասֆալտբետոնե ծածկը, այլև նորոգվել են մայթերը, դիտահորերը, թարմացվել են եզրաքարերը: Հիմնանորոգման աշխատանքների շրջանակում նորոգվել են նաև կանգառագոտիներն ու հարակից հատվածները: Շուրջ 600 փողոցներում կատարվել է մասնակի ասֆալտապատում: Ասֆալտապատվել են նաև 1000 բակային և միջբակային տարածքներ: Զուգահեռաբար իրականացվել են նաև փոսանորոգման և փոսալցման աշխատանքներ, մի շարք փողոցներ էլ, շուրջ 330 գծամետր, ճաքալցվել են:

Անդրադառնալով ասֆալտապատման աշխատանքների որակին` Ֆելիքս Յայլոյանը տեղեկացրել է, որ Երևանի քաղաքապետ Տարոն Մարգարյանի հանձնարարությամբ աշխատանքների ընթացքում իրականացվել է մշտական հսկողություն: Ի դեպ, քաղաքապետի հանձնարարությամբ, աշխատանքներն անորակ կամ թերի կատարած կազմակերպությունները, համաձայն պայմանագրային պարտավորությունների, ի հայտ եկած թերություններն արդեն վերացնում են սեփական միջոցներով:

«2012 թվականին Երևանի քաղաքապետարանի բյուջեով շինարարության և բարեկարգման վարչությունն իրականացրել է շուրջ 18.8 մլրդ դրամի շինբարեկարգման աշխատանքներ, այդ թվում՝ միայն 10 մլրդ դրամի ասֆալտապատաման, 8.8 մլրդ դրամի շինարարության բարեկարգման այլ տեսակի աշխատանքներ»,- նշել է Երևանի քաղաքապետարանի աշխատակազմի շինարարության և բարեկարգման վարչության պետը:

Ջեռուցման համակարգերով են ապահովվել մայրաքաղաքի ջեռուցման համակարգեր չունեցող և թերի ջեռուցվող դպրոցները, հիմնանորոգվել է 26 մանկապարտեզ: Մայրաքաղաքի տարբեր վարչական շրջաններում մաքրվել և վերանորոգվել է 137 շենքի ճակատային հատված, կառուցվել է մինի ֆուտբոլի 12 խաղադաշտ:

Մայրաքաղաքի քարաթափման վտանգ ներկայացնող 13 հասցեներում, ըստ անհրաժեշտության, կատարվել են քարաթափման, ցանցապատման, հենապատերի բարձրացման և ամրացման աշխատանքներ: