Ավելի քան 186 մլն դրամ կբռնագանձվի «Սյունիք» ԲԲԸ–ից՝ պետբյուջե

Սյունիքի մարզի ընդհանուր իրավասության առաջին ատյանի դատարանը բավարարել է ՀՀ դատախազության՝ 2012թ. հուլիսի 19-ի հայցադիմումը՝ «Սյունիք» ԲԲ ընկերության տնօրեն Ֆ. Կիրակոսյանից հօգուտ պետական բյուջեի 186.155.400 դրամ բռնագանձելու վերաբերյալ:

Նշենք, որ Սյունիքի մարզի ընդհանուր իրավասության առաջին ատյանի դատարանի՝ մայիսի 4-ի դատավճռով Ֆ. Կիրակոսյանը հանցավոր է ճանաչվել՝ հարկերը վճարելուց չարամտորեն խուսափելու համար՝ ՀՀ քրեական օրենսգրքի 205-րդ հոդվածի 2-րդ մաս, եւ դատապարտվել ազատազրկման՝ 4 տարի 6 ամիս ժամկետով: Նշված դատավճռով հիմնավորված էր համարվել, որ Ֆ. Կիրակոսյանը 2006-2007թթ. ընթացքում Սիսիանի տարածքային հարկային տեսչություն ներկայացրած ավելացված արժեքի հարկի եւ եկամտահարկի հաշվարկներում խեղաթյուրված տվյալներ մտցնելու միջոցով չարամտորեն խուսափել է առանձնապես խոշոր չափի՝ 186.155.400 դրամ հարկերը պետական բյուջե վճարելուց:

Միաժամանակ նրա նկատմամբ կիրառվել է «Համաներում հայտարարելու մասին» ՀՀ Ազգային ժողովի՝ 2009թ. հունիսի 19-ի որոշման 2-րդ մասի 2-րդ կետը, եւ նա ազատվել էր պատիժը կրելուց: Սակայն նկատի ունենալով, որ պետությանը պատճառված վնասը չի վերականգնվել՝ ՀՀ դատախազությունը հայցադիմում էր ներկայացրել դատարան՝ 186.155.400 դրամ պետական բյուջե վերականգնելու պահանջով, ինչը բավարարվել է: