Մեծ Բրիտանիայում գործազրկության մակարդակը նվազել է

Մեծ Բրիտանիայում գործազրկության մակարդակը հուլիս-սեպտեմբեր ամիսների տվյալներով նվազել է` հասնելով մինչև 7.8%-ի, հայտնում է Ազգային վիճակագրական բյուրոն (ԱՎԲ): Երեք ամիսների ընթացքում գործազուրկների թիվը նվազել է 49,000-ով` կազմելով 2.51 մլն մարդ: Ըստ Մեծ Բրիտանիայի Ազգային վիճակագրական բյուրոյի՝ գործազրկության մակարդակի նվազեցմանը նպաստել է երիտասարդների շրջանում աշխատատեղերի քանակի ավելացումը:

Բացի այդ, ԱՎԲ-ն հայտնել է, որ այս տարվա սեպտեմբերին ավելացել է գործազրկության թոշակ ստացողների թիվը` մոտ 10,000-ով: Գործազրկության օգնության համար դիմածների թիվը կազմել է 1.58 մլն մարդ, որն ամենամեծն է այս տարվա հուլիսից:

Նախորդ տարվա երրորդ եռամսյակի համեմատ` այս տարվա երրորդ եռամսյակում Մեծ Բրիտանիայի գործազուրկների թիվը նվազել է 110,000-ով: Վերջին եռամսյակի տվյալների համաձայն՝ զբաղվածների թիվն ավելացել է 100,000-ով, իսկ ամբողջ տարվա կտրվածքով` 500,000-ով: Այս տարվա երրորդ եռամսյակի տվյալներով՝ մոտ 30 մլն բրիտանացիներ ապահովվել են աշխատանքով:

Սակայն տնտեսագետները նշել են, որ Մեծ Բրիտանիայում զբաղվածության աճը գնալով դանդաղում է: Markit ընկերության տնտեսագետ Քրիս Ուիլյամսը, մեկնաբանելով Մեծ Բրիտանիայի աշխատանքի շուկան, նշել է. «Շատ ընկերություններ բրիտանական և համաշխարհային տնտեսության անորոշության պատճառով կրճատում են իրենց ծախսերը, որը հնարավորություն չի տալիս նոր մասնագետներ աշխատանքի ընդունել»:

Ըստ ԱՎԲ-ի՝ բրիտանացիների թիվը, որոնք կարող են մինչև տարեվերջ ապահովվել աշխատանքով, կազմում է 894,000 մարդ: Մոտ 443,000 բրիտանացիներ մոտակա մեկ-երկու տարիներին չեն կարող աշխատանք գտնել: Ժամանակավոր աշխատանք ունեցող բրիտանացիների թիվն այս տարվա երրորդ եռամսյակի տվյալներով կազմում է 8.1 մլն մարդ, որը ռեկորդային ցուցանիշ է: Մշտական աշխատանքով ապահովված են երկրի 21.4 մլն բնակիչներ: Գործազրկության մակարդակը նվազել է ինչպես կանանց, այնպես էլ տղամարդկանց շրջանում:

KPMG Management Consulting ընկերության տնօրեն Աննա-Մարի Դետերտը նշում է, որ զբաղվածության աճին նպաստել են ծառայությունների, արդյունաբերության և սեփական բիզնեսի ոլորտների զարգացումը: Տիկին Դետերտը կարծում է, որ դեռ վաղ է խոսել Մեծ Բրիտանիայի աշխատաշուկայի վիճակի լավացման մասին: «Բազմաթիվ բրիտանացիներ աշխատում են ժամանակավոր հիմունքներով, ինչը խոսում է հնարավոր թաքնված գործազրկության մասին»,- նշում է Աննա-Մարի Դետերտը: