Սերժ Սարգսյանի համար 1 թշնամին «ԳԱԻ»–ն է

Վերջին լուրեր 16 Նոյեմբեր, 2012 1:45

«ԳԱԻ» կոչվող պորտաբույծ կառույցի կողմից հանրապետությունում մոլեգնող թալանը նորանոր դրսևորումներ է ձեռք բերում: Ըստ երևույթին, իրագործվող «բարեփոխումների» համար այս հիմնարկում հատուկ «ուղեղային կենտրոն» է ձևավորվել, որտեղ հավաքված «հանճարներն» էլ մոգոնում են, թե ինչ նոր ձևերով ու հուսալի եղանակներով կարելի է մինչև վերջին կոպեկը թալանել սեփական ժողովրդին:

Այդ «հանճարեղ» ուղեղներից մեկն էլ հայտնաբերել է թալանի յուրօրինակ ձևերից մեկը: Ինչպես հայտնի է, արագաչափերի կողմից ֆիքսված իրավախախտումների վերաբերյալ արձանագրությունները վարորդները ստանում են փոստի միջոցով: Փոստատարը գալիս է ձեր տուն՝ ծանուցումը տալու: Եվ ահա փոստատարը գալիս է, դուք տանը չեք: Ի՞նչ է անում փոստատարը: Հետ է գնում, հետո էլի է գալիս, էլի տանը չեք ու վերջ՝ այդքանով փոստատարի աշխատանքը համարվում է ավարտված. իրավախախտման ծանուցումը վերադարձվում է «ԳԱԻ»: Եվ հենց այդ պահից էլ սկսվում է օրինախախտում կատարած անգամ ամենաօրինակելի, անգամ ամենամեծ հարգանք վայելող քաղաքացու կյանքի «թրիլլերը»՝ սարսափի ելևէջներով:

«ԳԱԻ» վերադարձվելուց հետո տուգանքի չափը հնգապատկվում է: Այսինքն, եթե ձեր տուգանքը 5000 դրամ էր, այն դառնում է 25 հազար, եթե 50 հազար՝ 250 հազար: Այս պարագայում իրավախախտման օրինաչափ կամ ոչ օրինաչափ լինելը չի քննարկվում: Ոչ էլ սա այն դեպքն է, երբ քաղաքացին հրաժարվում է վճարել տուգանքը: Քաղաքացին չի վճարում, քանի որ տեղյակ էլ չէ, թե ինքն ընկել է նման փորձանքի մեջ: «ԳԱԻ» վերադարձված, հնգապատկված տուգանքը չվճարվելուց հետո (քանի որ քաղաքացին այդպես էլ տեղյակ չի պահվում և շարունակում է իր համար ապրել), այն ուղարկվում է Դատական ակտերի հարկադիր կատարման ծառայություն: Այստեղ էլ որոշ ժամանակից հետո, գործող կարգի համաձայն, տվյալ անձնավորության նկատմամբ հայտարարվում է հետախուզում:

Հիմա, ենթադրենք, իքս անձնավորությունը 5000 դրամի ինչ-որ խախտում է կատարել: Մեր հերոսը չունի ֆինանսական որևէ խնդիր, դիտավորյալ, չարամտորեն չի գնացել օրենքին հակառակ, կյանք է, ստացվել է, խախտել է: Բայց մարդը կարգին գործարար է, անընդհատ զբաղված է, տանը գրեթե չի լինում: Փոստատարը գալիս է մեկ, գալիս է երկու, և, ահա, մեր գործարարի «գործը» ուղարկվում է «ԳԱԻ»: «ԳԱԻ»-ն «պաս է տալիս» ԴԱՀԿ-ին, որն էլ հետախուզում է հայտարարում մեր գործարարին: Իսկ մինչ այդ մեր գործարարը մի երեք ամիս, ենթադրենք, Հայաստանում չէր, արտերկրում լուրջ գործարքներ էր կնքում, լուրջ ներդրողներ էր գտել, համոզել, որ գան Հայաստան: Եվ ահա, գործընկերների հետ Հայաստան է գալիս, ինքնաթիռը իջնում է, մտնում են «Զվարթնոց» օդանավակայան և... հոպ-ստոպ՝ մեր գործարարին ձերբակալում են: Ինչո՞ւ: Որովհետև նրա նկատմամբ հետախուզում է հայտարարված: Ինչո՞ւ: Որովհետև այն խախտումը, որն արել էր գործարարը, որի մասին ծանուցումը բերել էր փոստատարը, բայց որն ուղարկվել էր «ԳԱԻ» և որը «ԳԱԻ»-ում հնգապատկվել էր ու հետո էլ ուղարկվել ԴԱՀԿ...

Ինչպես տեսնում ենք վատ թրիլեր չստացվեց. սարսափի ելևէջներն էլ տեղում էին՝ հաշվի առնելով մեր գործարարի գործընկեր-ներդրողների ապրումներն առ այն, թե ինչպես են եկել-հասել աշխարհի ծայրը՝ հավատալով «հետախուզման մեջ գտնվող մեկի» հավաստիացումներին:

«ԳԱԻ»-ում ասում են, թե դա իրենց խնդիրը չէ, «դա Ձեր և փոստատարի խնդիրն է»: Փաստորեն, «ԳԱԻ»-ն քիչ էր, շուտով ՀՀ քաղաքացիների գլխին մի նոր, «գայիշնիկին» հավասարազոր կաստա էլ է ավելանալու՝ ի դեմս փոստատարների, քանի որ յուրաքանչյուր պոտենցիալ և ոչ պոտենցիալ գործող վարորդ պետք է իմանա, որ փոստատարի հետ հարկավոր է լավ լինել, նրան սիրաշահել, նրան տեսնելիս խոնարհվել, այլապես պարոն կամ տիկին փոստատարը կարող է սեփական հայեցողությամբ վարվել ձեր ծանուցումների հետ՝ դրանով իսկ իր ձեռքում պահելով ձեր կյանքի թրիլերի մեկնարկի պուլտը:

Երբ արագաչափերը դեռ նոր էին որոշում գործարկել, փոխոստիկանապետ Արթուր Օսիկյանը, ներկայացնելով հայրենական «ԳԱԻ»-ում ներդրվելիք այդ նոու-հաուն, պատմում էր, թե ինչքա՜ն է հեշտանալու դրանից հետո վարորդների կյանքը, որոնք այլևս ստիպված չեն լինի շփվել ցմփոր ու անգրագետ, ձմեռ ժամանակ էլ հիմնականում առավոտ կանուխ խաշ կերած ու սխտորահոտ փչող «գայիշնիկների» հետ. քաղաքակիրթ տեսախցիկը կֆիքսի խախտումը, որից հետո քաղաքակիրթ վարորդը կստանա քաղաքակիրթ SMS, կմտնի մուծումներ ընդունող ցանկացած քաղաքակիրթ հիմնարկ, կմուծի... մի խոսքով, ոտից գլուխ էլեգիա՝ թրիլերից նշույլ անգամ չկար:

Չանցած մի քանի ամիս, արդեն առկա են հանրության շրջանում հասունացող բունտի բոլոր նախադրյալները:

Եթե ոստիկանությունում կարծում են, թե աշխատանքի ամենաճիշտ և օպտիմալ ձևը վարորդների դժգոհությունները բանի տեղ չդնելն է, չարաչար սխալվում են: Եթե Բաղրամյան 26-ում կարծում են, թե «ԳԱԻ»-ն իր գործն է անում և դա իրենց չի վերաբերում, է՛լ ավելի են սխալվում: «ԳԱԻ»-ի ֆիքսած իրավախախտումների թիվն արդեն միլիոնի է հասնում: Հազիվ երեք միլիոնանոց Հայաստանում դա նշանակում է, որ չկա ընտանիք, որտեղ «ԳԱԻ»-ն իր «կեղտոտ ոտքերով» ներխուժած չլինի: Միայն «ԳԱԻ»-ի՝ արդեն մի քանի ամիս մոլեգնող թալանի հետևանքով այնպիսի բունտ է հասունանում, որի չափերի ու վտանգավորության աստիճանն այսօր որևէ մեկը չի էլ կարող պատկերացնել: Մեր թրիլերի հերոսը վճարունակ քաղաքացի էր. մեծ երևակայություն պետք չէ ունենալ՝ հասկանալու, թե ինչ են զգում բոլոր ոչ վճարունակ քաղաքացիները, բոլոր նրանք՝ այն հազարավոր ու հարյուրհազարավորները, որոնք այսօրվա Հայաստանում ապրում են նվազագույն կամ միջին կոչվող, բայց նվազագույն կենսամակարդակ ապահովելու անընդունակ աշխատավարձով: Իսկ որ հասունացող և արդեն իսկ նշմարելի բունտը կարող է և ունի բոլոր հիմքերը՝ հանկարծակիի բերել ընտրությունների պատրաստվող նախագահին, փաստ է, որի հետ հաշվի չնստելն առնվազն «ախմախություն է»:

Լուսինե Կեսոյան