«Առավոտ». Թիվ մեկ ընտրատարածքում ՀՀԿ-ական թեկնածուին սատարում է Ռուբեն Հայրապետյանը

«Մենք ընկերներ ենք եղել, մենք մի բակում ենք մեծացել, և երբ նա ամուսնացել է իմ քրոջ հետ, թաղապետ կամ քաղաքապետ չի եղել: Ես հպարտ եմ, որ իմ փեսան դարձավ քաղաքապետ, ի՞նչ վատ բան կա դրանում: Ես հարգում եմ Տարոն Մարգարյանին` որպես մարդ, որպես փեսա, ընտանիքի հայր, քաղաքապետ, որպես լավ մարդու զավակ: Տարոն Մարգարյանի հետ ես նաև կուսակից ընկեր եմ»,- «Առավոտի» հարցին այսպես` վրդովմունքով արձագանքեց մայրաքաղաքի Ավան վարչական տարածքն ընդգրկող թիվ 1 ընտրատարածքում պատգամավորի թեկնածու, ՀՀԿ-ական Ռոբերտ Սարգսյանը: Վերջինս քաղաքապետ Տարոն Մարգարյանի աներորդին է, և այդ փաստը բավականին շահարկվեց: Պատգամավորության թեկնածուից «Առավոտը» փորձում էր ճշտել` արդյոք դա իր միա՞կ արժենքն է:

Հիշեցնենք, որ մայրաքաղաքի Ավան վարչական տարածքն ընդգրկող թիվ մեկ ընտրատարածքում դեկտեմբերի 2-ին կայանալու են Աժ մեծամասնական ընտրակարգով ընտրություններ: Այդ ընտրատարածքից պատգամավոր դառնալու համար կպայքարեն ՀՀԿ-ից` Ռոբերտ Սարգսյանը, «Ժառանգությունից»` Ստեփան ՍաՖարյանը, Հայաստանի կանաչների կուսակցության նախագահ Արմենակ Դովլաթյանը և ԺԿ անդամ Էդուարդ Պետրոսյանը:

Ի դեպ, Ռոբերտ Սարգսյանը ակնհայտորեն խուսափում է լրագրողների հետ շփումներից: «Առավոտը» ՀՀԿ-ական թեկնածուի հետ փորձում էր հանդիպման մասին պայմանավորվածություն ձեռք բերել դեռ թեկնածությունների առաջադրումներից սկսած: Չէր հաջողվում: Երեկ, ընտրողների հետ հանդիպումից հետո, թերթի թղթակիցը կարողացավ ճեղքել ՀՀԿ-ական թեկնածուին ուղեկցողների շարքը: Մի քանի հարցերի, այնուհանդերձ, պատասխանեց:

Իսկ ընտրողների հետ հանդիպումը, այսպես ասած, բազմաբովանդակ էր` մինչ ՀՀԿ-ական թեկնածուի հասցեին հիացմունքի և նրա նկատմամբ սիրո ու հավատի հավաստիացումներ էին հնչում, կողքի կանգնած մի տարեց մարդ հուսահատ թափ տվեց ձեռքն ու դուրս եկավ' ասելով. «Կարո՞ղ ա չընտրվի, մեկ ա ինքն ա լինելու»:

ՀՀԿ-ական թեկնածուից «Առավոտ»-ը հետաքրքրվեց`թիվ մեկ ընտրատարածքի նախկին պատգամավոր Ռուբեն Հայրապետյանն իրեն աջակցո՞ւմ է: Հիշեցնենք, որ վերջինս «Հարսնաքար» ռեստորանային համալիրի ողբերգական դեպքերից հետո վայր դրեց մանդատը: «Ռուբեն Հայրապետյանը մեր համայնքի հիմնադիր թաղապետն է եղել, իմ կուսակցության խորհրդի անդամ է, բավականին մեծ աշխատանք ունի կատարած մեր համայնքում և հանրապետությունում: ՀՀԿ խորհրդի ողջ կազմը և Ռուբեն Հայրապետյանը, Տարոն Մարգարյանը, վստահաբար կարող եմ ասել նաև թիվ մեկ ընտրատարածքի բնակչության մեծամասնությունը սատարում են ինձ, և դրա համար ես միայն շնորհակալ եմ բոլորից»: