Նեմեցի համար հաշվեհարդարը սովորական կյանքի ընթացք է

«Պահանջում ենք պատժել «Հարսնաքարում» տեղի ունեցածի բոլոր մեղավորներին» քաղաքացիական նախաձեռնության անդամ Զարուհի Հովհաննիսյանը Facebook սոցցանցի իր էջում գրել է.

«Այն, որ Նեմեցի համար հաշվեհարդարը սովորական կյանքի ընթացք է, գաղտնիք չէ, նա դրանով զբաղվել է ու կզբաղվի միշտ: Իսկ մարդիկ վախենում են նրանից ու նրա արածները ծածկում են, հետագա հաշվեհարդարներից խուսափելու համար: Բժիշկ Հովասափյանի հետ կատարվածը ոչ առաջին դեպքն է, ոչ էլ վերջինն է լինելու: Դեռևս Ար հեռուստաընկերությունում աշխատելուս տարիներին հիշում եմ, որ հրկիզվել էր «Արմենիա» հեռուստաընկերության ֆուտբոլային մեկնաբան, «Ֆուտբոլ +» թերթի հիմնադիր Սուրեն Բաղդասարյանի «Տոյոտա-Պրադո» մակնիշի ավտոմեքենան ու հենց առաջին պահին նա հստակորեն մեղադրեց դրանում Նեմեցին: մեջբերեմ, դուք էլ կհամոզվեք. «Ռուբեն Հայրապետյանը ինձ մի քանի անգամ սպառնացել է. «Կցխեմ պատին», «կվերացնեմ» եւ այլ արտահայտություններով։ Մի առիթով էլ ասաց, թե մարդկանց է վարձելու, որ քայլերս լուսանկարեն։ Եւ սա մեր Ազգային ժողովի պատգամավորն է։ Միանշանակ նրան եմ կասկածում, քանզի առ այսօր ինձ բոլորն էլ հարգել են եւ որեւէ մեկին վատություն չեմ արել։ Բացարձակ չեմ կասկածում, որ կատարվածի հեղինակը Ռուբեն Հայրապետյանն է։

Գիտեմ ով է կազմակերպել, անունն էլ նշեցի, եւ թող հանրապետության ղեկավարությունը բարի լինի համապատասխան միջոցներ ձեռնարկի։ Մենք գերի չենք մեր երկրում»: Հետո իրադարձությունների ընթացքը փոխվեց ու ֆուտբոլի մեկնաբանը հրապարակավ ներողություն խնդրեց և հերքեց: Էնպես որ նման բաներ եղել են արդեն, ուղղակի հասարակությունն է փոխվել ու պատասխանատվության է կանչելու բոլոր հանցագործներին, անկախ նրանից, թե որքան է վախեցած զոհը»: