Արմեն Աշոտյանը` Անահիտ Բախշյանի հայտնած հանցագործության դեպքի մասին

Լուրեր.com-ի հետ զրույցում ԿԳՆ Արմեն Աշոտյանը, անդրադառնալով այն հարցին՝ տեղյա՞կ է ՀՀ կրթության և գիտության նախարարության Կրթության ազգային ինստիտուտի փոխտնօրեն Անահիտ Բախշյանի այն հայտարարությանը, որ Երևանի թիվ 27 դպրոցում կան ապօրինություններ, ասաց, որ նման հարցերով առաջինը պետք է զբաղվի դպրոցի լիազոր մարմինը։

«Նման հարցերով պետք է առաջինը զբաղվի դպրոցի լիազոր մարմինը, այնուհետև`քաղաքապետարանը, այնուհետև, ահազանգ ունենալու դեպքում, Գիտության ու կրթության պետական տեսչությունը։ Ես չեմ հիշում՝ կա թարմ ահազանգ, թե` ոչ»,- ասաց ԿԳ նախարարը։

Նշենք, որ որոշ ժամանակ առաջ Լուրեր.com-ը զրուցել էր ՀՀ կրթության և գիտության նախարարության Կրթության ազգային ինստիտուտի փոխտնօրեն Անահիտ Բախշյանի հետ, ով ասել էր, որ Երևանի թիվ 27 դպրոցում կրճատված 4 ուսուցիչներից Հայկ Սիմոնյանը դպրոցում աշխատել է միայն մի քանի ամիս, իսկ վերջինիս կրճատման հրամանը տրվել է մի քանի ամիս անց։

Լուրեր.com-ը հարց էր բարձրացրել, թե այդ դեպքում մի քանի ամիս շարունակ ինչպես է ստացվել, որ փաստացի չաշխատող ուսուցչի ազատումն աշխատանքից իրավաբանորեն ձևակերպվում է մոտ մեկ տարի անց։ Ոչ մեկի համար թերևս գաղտնիք չէ, որ եթե աշխատանքային պայմանագիրը լուծված չէ, ապա անձը համարվում է աշխատող, հետևաբար և վարձատրվում է։ Այս դեպքում առաջ է գալիս տրամաբանական մեկ այլ հարց՝ ո՞վ է ստացել փաստացի չաշխատող ուսուցչի աշխատավարձը։

Ավելի ուշ Լուրեր.com-ի լրագրողի հարցին՝ պատկան մարմիններն այս գործով արդեն զբաղվում են, թե՝ ոչ, Անահիտ Բախշյանն ասել էր՝ դեռ ոչ, և հույս հայտնել, որ պատկան մարմիններն այս հաղորդումից հետո կզբաղվեն. «Այս փաստաթղթերը ես սիրով կներկայացնեմ պատկան մարմիններին, եթե ինձնից պահանջեն»։

Լուրեր.com-ը զրուցել է նաև ՀՀ ոստիկանության մամուլի բաժնի աշխատակցի հետ, ով ասաց, որ դեռ ճշտում են՝ հայտարարության հիման վրա գործ հարուցվել է, թե` ոչ։