Ընդդիմությունը քամի կանի, կգնա տուն. Շարմազանով

Նոյեմբերի 21-ին «Հայ ազգային կոնգրես» (ՀԱԿ) խորհրդարանական խմբակցության նախաձեռնությամբ կհրավիրվի Ազգային ժողովի արտահերթ նիստ: Արտահերթ նիստ հրավիրելու համար անհրաժեշտ էր 24 ժամվա ընթացքում 44 ստորագրություն հավաքել: Հինգշաբթի առավոտյան ժամը 11:15-ից ՀԱԿ-ը սկսել էր ստորագրությունների հավաքման գործընթացը, և, ինչպես արդեն Lurer.com-ը տեղեկացրել էր, արդեն հավաքվել է 48 ստորագրություն: Արտահերթ նիստի մասին Lurer.com-ը զրուցեց ԱԺ փոխնախագահ Էդուարդ Շարմազանովի հետ, ում խոսքով՝ այդ օրը քվորում չի լինելու, և այդ փաթեթն օրակարգ մցնելու հարցերին քաղաքական մեծամասնությունը, քաղաքական կոալիցիան արդեն իսկ դեմ են քվեարկել, և օրակարգ չի մտել, որովհետև հանձնաժողովները տվել են բացասական եզրակացություն։

«Հիմա նոյեմբերի 21-ին նրանք արտահերթ նիստ են հրավիրել, մարդիկ կգան, կգրանցվեն, միջանցքներում աժիոտաժ կլինի, քվորում չի լինի, կգնան տուն։ PR կանեն, հնար կանեն, կասեն՝ տեսաք, մենք ուզում էինք կոռուպցիայի դեմ պայքարեինք, վատ քաղաքական մեծամասնությունը չի ուզում ժողովրդի մատից փուշ հանել, մամուլի ակումբներն էլ լիքը կլինեն, քամի կանեն կգնան տուն։ Ի՞նչ պիտի անեն»։

Լրագրողի այն դիտարկմանը, թե ինքը տեղյակ է, որ արտահերթ նիստի օրը, այսինքն՝ մյուս չորեքշաբթի, Ազգային ժողովի շենքի առջև նաև պիկետ կկազմակերպվի, և այդ կերպ ժողովուրդը կաջակցի ընդդիմադիրների նախաձեռնությանը, Շարմազանովը պատասխանեց. «Լավ ա, ինչ ա եղել, քաղաքական ակցիաներ են, թեթև տարե՛ք, նախընտրական շրջան ա, նմանատիպ ակցիաներ դեռ շատ կլինեն։ Մանավանդ այլընտրանք + ընդդիմադիր ուժերը քառասունչորս ձայները միշտ էլ կարող են հավաքել, հանրահավաքներ անել, բայց նրանք ստիպված կլինեն թուղթ փչացնել, ստորագրահավաք անել, հետո էլ ստորագրահավաքից հետո խելոք գնան տուն, որովհետև եթե մեծամասնությունը կողմ լիներ դրան, կողմ կքվեարկեինք։ Իրենք, շատ լավ իմանալով, որ արտահերթ նիստը չի կայանալու, պարզապես գնում են քաղաքական հնարքի, քաղաքական բլեֆի»,-եզրափակեց Էդուարդ Շարմազանովը։