Frankfurter Allgemeine. Անգելա Մերկելը մեկնում է Մոսկվա. Ռուսական ռեգբին

Անգելա Մերկելը նոյեմբերի 16-ին մեկնելու է Մոսկվա, որտեղ հանդիպելու է Կրեմլի ղեկավար Վլադիմիր Պուտինի հետ:

Տրամադրվածությունը վատ է քան երբևէ. գրում է գերմանական պարբերականը: Երկու կողմերն էլ ընդհանուր լեզու չեն գտնում երկխոսության համար: Գերմանական կողմը քննադատության է ենթարկում Ռուսաստանին, ինչին ռուսական կողմն արձագանքում է բանավոր հարձակումներով:

Գերմանիայի քրիստոնյա-դեմոկրատական միության պատգամավոր Էլմար Բրոքը բանակցության նպատակով նույնպես Մոսկվա է մեկնել՝ մասնակցելու 12-րդ «Պետերբուրգյան բանակցություններին»: Ռուս-գերմանական ֆորումն այս տարի պետք է որ օգնի հարթել Մոսկվայի և Բեռլինի միջև առաջացած ճաքերը:

Կրեմլը ԽՍՀՄ անկումից ի վեր երբեք այսքան դաժան և պարբերական ռեպրեսիաներ չի իրականացրել իր ընդդիմադիրների նկատմամբ. գրում է թերթը: Վլադիմիր Պուտինի՝ կրկին իշխանության գալուց հետո շուտափույթ կերպով մի շարք օրենքներ են ընդունվել, որոնք էականորեն նեղացրել են ընդդիմության և քաղաքական հասարակության գործունեության շրջանակները:

Գերմանական կողմը քննադատում է Pussy Riot-ի նկատմամբ իրականացված հետապնդումներն ու Սիրիայի հարցում Ռուսաստանի բռնած աջակցողական դիրքորոշումը:

Ներկա ռուսական ղեկավարության օրոք Մոսկվայի և Բեռլինի միջև ռազմավարական համագործակցությունը միայն խաբկանք է, սակայն Ռուսաստանն ու Գերմանիան ամեն դեպքում առանց իրար չեն կարող: Այդ պատճառով «Պետերբուրգյան բանակցությունները» Մոսկվայում շատ լավ քայլ են հարաբերությունների կարգավորմանն ընդառաջ:

Նոյեմբերի 16-ին Մոսկվայում կայանալիք միջպետական խորհրդակցություններն արդեն 14-րդն են Բեռլինի և Մոսկվայի միջև: Մոսկվայի ժամանակով 15:00-ին Գերմանիայի կանցլեր Մերկելի օդանավը կժամանի Մոսկվա, որից հետո նրանք նախագահ Պուտինի հետ իրենց այցով կպատվեն «Պետերբուրգյան բանակցությունների» լիագումար եզրափակիչ նիստը, որը, որպես կանոն, ընթանում է այդ խորհրդակցություններին զուգահեռ: