New York Times. Օբամայի հաղթանակն ապահովել են միասեռականները

ԱՄՆ-ի նախագահ Բարաք Օբամայի վերընտրման հարցում որոշիչ դեր կարող էր խաղալ ոչ թե լատինաամերիկացիների կամ այլ էթնիկ փոքրամասնությունների համակրանքը, ինչի մասին խոսում էին մի շարք քաղաքական գործիչներ, այլ գրեթե աննկատ մնացած միասեռականների հսկայական աջակցությունը. այս մասին վկայում են նոր հետազոտության արդյունքները։

Վերլուծելով հարցումների տվյալները՝ Williams ինստիտուտի և լաբորատորիայի ներկայացուցիչները պարզել են, որ Բարաք Օբաման և Միթ Ռոմնին ստացել են գրեթե նույն թվով ձայներ ավանդական սեռական կողմնորոշում ունեցող ընտրողներից բոլոր նահանգներում՝ բացառությամբ Օհայո և Ֆլորիդա նահանգների, որտեղ Ռոմնին փոքրիկ հաղթանակ է տարել ընտրողների այս խմբի շրջանակներում։ Սակայն միասեռական ընտրողների շրջանակներում, որոնց թիվը կազմել է շուրջ 5%, Օբաման հաղթել է 3-1 հարաբերակցությամբ, ինչը բավական էր ազգային մասշտաբով հաղթանակի համար. գրում է New York Times-ը:

Ըստ սոցիոլոգների՝ հանրապետականները հետևողականորեն զիջում են դեմոկրատներին այնպիսի սոցիալական խմբերի դեպքում, ինչպիսիք են աֆրոամերիկացիները, լատինամերիկացիները, ասիական ծագման ամերիկացիներն ու հրեաները։

Չնայած այն հանգամանքին, որ այս փոքրամասնություններից յուրաքանչյուրը բավականին փոքր է, նրանք միասին կազմում են ընդհանուր ընտրազանգվածի մեկ երրորդը, ինչի հետևանքով հանրապետականները դեռևս պետք է պայքարեին ընտրողների երկու երրորդի շրջանակում առավելագույն թվով ձայների համար։

Համեմատության համար սպիտակ բողոքական բնակչությունը, որը հանդիսանում է հանրապետականների հիմնական ընտրազանգվածը, կազմում է բնակչության միայն 25%-ը, և այդ խումբը չի աճում մեծ արագությամբ։