Եվրասիական միության նպատակը Ռուսաստանի ազդեցության գոտիները պահպանելն է

Այսօր «Ժառանգություն» կուսակցության վարչության գլխավոր քարտուղար Ստեփան Սաֆարյանը և «Նոր ժամանակներ» կուսակցության ղեկավար Արամ Կարապետյանը մասնակցեցին Եվրասիական միության վերաբերյալ քննարկմանը։

Քննարկման ժամանակ Արամ Կարապետյանն ասաց, որ ինքը մոդելը դիտարկում է զուտ տնտեսական համատեքստում և կարևորում է այս ձևաչափով Ռուսաստան-Հայաստան տնտեսական հարաբերությունների խորացումը և անգամ հնարավոր համարում Հայաստանի անդամակցությունը Մաքսային միության հետ։ «Տնտեսական ինտեգրացիայի հարցը Հայաստանի համար առաջնային է»,- նկատում է վերջինս։

Կարապետյանի խոսքով՝ 950 մլրդ դոլարի ապրանքաշրջանառություն ունեցող կայացած Մաքսային միություն կա, որին, սակայն, Հայաստանը չի կարողանում անդամակցել Ռուսաստանի հետ ընդհանուր սահման չունենալու պատճառով:  Մեր տրանսֆերների մեծ մասը գալիս է Ռուսաստանից: Այս փաստերը պետք է տեսնենք ու հաշվի առնենք:

Իսկ մյուս բանախոսի՝ Ստեփան Սաֆարյանի կարծիքով՝ Եվրասիական միության գաղափարը Ռուսաստանի նախագահի գաղափարն է։

«Որքան էլ ասեն՝ ակադեմիկներ են ներդրում ունեցել այս գաղափարի ստեղծման գործում, այն ընկած է Ռուսաստանի նախագահի տեսլականում: Միության հետապնդած նպատակներն աշխարհաքաղաքական են»,-ասաց Ստեփան Սաֆարյանը:

Ըստ նրա՝ Ռուսաստանի պարագայում առաջին մտահոգությունն իր ազդեցության գոտիները պահպանելն է, ազդելն այդ երկրների արտաքին քաղաքական կուրսի վրա, լավագույն դեպքում՝ դանդաղեցնել նրանց ընթացքը դեպի Եվրամիություն: «Սա մրցակից պրոյեկտ է, և այն փորձում է այլընտրանք լինել Եվրոպական միությանը»,-հավելեց վերջինս։