ԵՄ-ն կոչ է անում վերջ դնել բռնությանը Գազայի հատվածում և Իսրայելում

ԵՄ բարձրագույն ներկայացուցիչ Քեթրին Էշթոնն իր խորին մտահոգությունն է հայտնել Իսրայելում և Գազայի հատվածում բռնությունների համար և ափսոսանք հայտնել երկու կողմից էլ քաղաքացիական բնակչության շրջանում կորուստների կապակցությամբ։ «ՀԱՄԱՍ-ի և այլ խմբավորումների կողմից հթիռային ռմբակոծությունները, որոնք սկիզբ դրեցին ներկա ճգնաժամին, ամբողջովին անընդունելի են ցանկացած կառավարության համար և պետք է դադարեցվեն»,-նշվում է ուրբաթ օրը Բրյուսելում տարածված հայտարարության մեջ։

Էշթոնը հայտարարել է, որ Իսրայելն իրավունք ունի պաշտպանելու իր բնակչությանը նման հարձակումներից, սակայն կոչ է արել Թել Ավիվին ապահովել «համամասնական արձագանք»։ Նա հաղորդել է, որ տարածաշրջանային առաջնորդների և ՄԱԿ-ի գլխավոր քարտուղար Բան Կի Մունի հետ խոսելիս ընդգծել է հետագա լարվածության և մարդկային կորուստների անթույլատրելիության անհրաժեշտությունը։

Եվրոպական դիվանագիտության ղեկավարը պնդում է, որ անհրաժեշտ է շարունակել փնտրել Մերձավոր Արևելքում հակամարտության լուծման ուղիներ, որպեսզի տարածաշրջանում միլիոնավոր մարդիկ կարողանան ապրել խաղաղության և անվտանգության մթնոլորտում։ Նա հույս է հայտնել, որ Եգիպտոսի վարչապետ Հիշամ Քանդիլի այցը Գազայի հատված կարող է հանգստացնել իրավիճակը։